دعوة للنقاش : حسن شحاته مدرب ذو قدرات أم ناجح بالصدف

[Ahmed_hagazy]

دعوتنا اليوم للنقاش حول المدير الفني للمنتخب المصري حسن شحاته أو المعلم كما يحب أن يطلق عليه .

البعض هاجمه و والبعض الاخر أتفق معه لكن لا يختلف إثنين حول المدرب الذي قاد مصر للحصول علي بطولتي القارة لعاميين متتاليين وقاد مصر للحصول علي المركز الأول في جميع البطولات الرسمية التي قاد منتخب مصر خلالها .

لك عزيزي الزائر >> مشوار حسن شحاته التدريبى :

..بطولة الجمهورية للشباب فى 1983 مع فريق الزمالك للشباب
..تدريب فريق الموصل الاماراتى
91/92 تدريب فريق الاتحاد السكندرى
..الصعود باندية المنيا - الشرقية - السويس - المقاولون الى الدورى الممتاز
..الحصول مع المقاولون على كاس مصر عام 2003 /2004
..الحصول مع المقاولون على السوبر المصرى عام 2003 /2004
..الحصول مع منتخب الشباب على كاس الامم عام 2003
..الحصول على كاس الامم الافريقية فى عامي 2006 , 2008

دعوة للنقد البناء والنقاش حول إمكانيات هذا المدرب المصري الأصيل - هل هو مدرب ذو إمكانيات عالية ؟ ,, أم مدرب صنعته الصدفة و كان الحظ حليفه !! وهل يستطيع أن يقودنا الي الحلم الأكبر (( كأس العالم )) ؟ ‘ وما السبب الذي يدفع من يهاجمه ؟. ...

[نسر الشرق]

السلام عليكم

حسن شحاته كمدرب يعمل بدون اى مصالح او عدوات معا اللاعبين وبدون اى تمييز سيكون بالطبع ومعروف انه ممتاز جدا

لكن اخطاء حسن شحاته الاخيره والتشيكيلات الخياليه اللى بيختارها

وكمان استبعاد مجموعة قوية جدا امثااال

عمرو جمال وبركات وشريف عبد الفضيل وسيد معوض وجمال حمزه وزيدان

اظن صعب جدا

وعلى اعتبار ان المجموعة دى اخطأت فعلا

طيب ما اهو نفس الحال يمشى على ميدو

[thematrix]

مش عارف هو غريب جدا فى الماتشات العادية ما بيدهاش اى اهمية

لكن فى الماتشات المهمة حتى لو كانت صعبة بتلاقى المنتخب بيعلب فعلا

مش عارف ده بيرجع للاعيبه ولا للجهاز

[poet]

حسن شحاته مدرب كويس بس عليه حاجات غريبه وبيستبعد نجوم كبار من غير ابداء اسباب مثل محمد زيدان وسيد معوض قال ايه خلافات طيب منتا كنت متخانق مع ميدو وكانت فضيحه زي مشوفنا علي الموبيلات وبعدين بقت انتا وهو سمن علي عسل تاني
اما امرك عجيب يبو كف

[STEKOSTYLE]

هو فعلا عنده حجات غريبه

[NEDVED_SMAX]

والله من غير أبو تريكه ولا يسوى

[ana ahlawy]

قدرات حسن شحاته تكمن فى الاعبين الاكفااااء
امثال ابو تريكه و احمد حسن و وائل جمعه و عمرو زكى و شوقى و حسنى و هانى و الحضرى
لو راحت اللعيبه دى لا قدر الله
قول على شحاته يا رحمن يا رحيم
بيبقا فى موقف زباله ساعتها لو لاعب اساسى مصاب

مفيش مدرب فى العالم بيكسب لوحده من غير لاعبين

و مش كل مره حسن شحاته يغلط يروح واحد زملكاوى جايبلى تاريخ حياته
و يقولى ده جاب 2 كاس امم

طيب ما جوزيه جايب مع الاهلى 16 بطوله
و جايب نصف بطولات الاهلى الافريقيه
و مع ذلك يطلع علينا الاخوه الزملكاويه و يقولوا ده مدرب محظوظ
و بيكسب بالحكام و بالحظ

[moha_italy]

حسن شحاته مفش شك انه مدرب كبير وعمل تاريخ كبير جدا كفايه انه متغلبش من ساعة ما تولى تدريب المنتخب الامرتين من ساحل العاج فى ارضها ومن مالاوى بالحظ فى ارضها برضه(ده بالنسبه للرسمى)
اما الودى فدى ماتشات للتجريب يجرب فيها الخطط صحيح الفز برضه مهم
وبيدى دفعه للامام وبرضه مش لدرجه الهزيمه 4 ومن السودان بس هو حظه ان اللاعيبه مانتش فى يومها زى منصف وفتح الله والفريق كله عموما

بالنسبه لموضوع الحظ فاى مدرب او لاعب محتاج ان يكون معاه توفيق من ربنا علشان يقدر
يكمل كوره مش علشان يبقى نجم
البعض بيقول انه محظوظ بالجيل اللى معاه طيب منبص بنظره اعمق شويه ونقول ان الجيل ده اساسه او القوام الاساسى بتاعه منتخب الشباب بتاع 2003
اللى برضه حسن شحاته هو اللى دربه وهو اللى عملهم نجوم ومحدش كان يعرف اسم اى
واحد فيهم قبل البطوله زى (حسنى عبد ربه و احمد فتحى و عماد متعب و عمرو زكى و محمد عبد الوهاب الله يرحمه) ده غير اكرامى و امير عزمى اللى بره الصوره الايام دى

صحيح الايام دى بقى فيه شويه تصرفات غريبه بس اعتقد انها بعيده كل البعد عن حبه او كرهه لاى نادى
زى مثلا موضوع المفاوضات مع اللاعبين داخل معسكر المنتخب
عملها الاهلى مع معوض فى التجمع بتاع غانا
والزمالك مع امير والاسماعيلى مع عبد ربه فى التصفيات
اعتقد ان المفروض حسنى بس اللى يسيبه يقابل مسئولى ناديه اما غير كده فكان لا

اما الخناقات مع اللاعبين انا شايف انه صح
لانه بيحاول انه يطبق مبدء ان المنتخب مش هيقف على حد
بالنسبه لواحد زى عمر جمال وشريف عبد الفضيل وسيد معوض وشادى مفيش مشاكل وهيرجعوا قريب
اما واحد زى جمال
اول ما شحاته مختارهوش طلع وقعد يتكلم ويجعجع بعكس واحد زى شادى محمد قال انا نفسى اروح المنتخب بس شحاته هو اللى بيختار وده اختياره

بركات : قال ان عنده مشاكل مع النجيل الصناعى واعتذر من المنتخب وبعد كده لعب مع الاهلى وغير كده تصريحاته برضه فيها عدم احترام حتى لو شحاته غلطان فى حقق برضه لازم تديله احترام خصوصا قدام الاعلام

اما زيدان انا موافق جدا على ابتعاده واحد جاى يقول انا فى اجازه وعندى فتره اعداد ومش هنضم للمنتخب وهو شايف اللاعيبه كلها مصابه وخصوصا فى مركزه اللى مكانش فيه غير شيكا اللى يادوب عنده ماتشين مع المنتخب وكمان ودى

اما ميدو رغم ان مشكلته كانت الاكبر الا انه فى يوميها كان بيعتذر ولحد النهارده بيعتذر
ده حتى فى النهائى كل شويه كان يبوس حسن شحاته بعد الفوز هو راجل بيفهم وبيعرف يعالج غلطه
هو عاوز كل اللاعيبه تبقى فى المنتخب وهو هيبقى الكسبان بس اللاعيبه تحترم نفسها شويه
وبرضه المسئولين بتوع اتحاد الكوره المفروض يصلحوا الامور
اما بقى التاهل للمونديال ان شاء الله هيحصل وساعتها شحاته هيكون رقم واحد فى تاريخ افريقيا كلها مش مصر بس
الراجل ده بيحب مصر قوى ده لما بيطلع فى برنامج ويقعد يتكلم عن مصر بحس انه بيتكلم عن دوله تانيه

[ana ahlawy]

ده انت طلعت شحاته يا mido_italy زى القرعه من الضفيره
ولا كانه عمل حاجه غلط
و طول ما هو شايف ان فيه ناس بتدافع عنه
حتى و هو غلطان هيكرر نفس الغلط
ولا كان شىء حصل

[ramy_200518]

ناجح لوجود ابوتريكه

[mazaagiiii]

مالوش فيها
واسالوا شوقي غريب
مدرب علي ما تفرج
سبب حصوله علي البطولات معروف
اللاعبين

[mahmoud rady]

انسان غريب الاطوار فعلا

وانا مش عارف بس هو لغايه دلوقتي كويس مقدرش اقول عنه حاجه

بس عيبه استبعاد بعض النجوم .