حسن شحاتة ليس حشرة

[zizoandonly]

السلام عليكم

كتر كثيرا فى الفترة الماضية
الهجوم الضارى ضد حسن شحاتة ووصفه بكلمات لا تجوز
وهو لا يستحق كل هذا الهجوم عليه

لكن هل يستحق شحاتة منصب مدرب منتخب مصر

ما يعرفه الكثير من الجماهير ويتجاهلونه
ان حسن شحاتة له انجازات عديدة على كثير من المستويات

اولا:اخد بطولة افريقيا للشباب فى بوركينا فاسو
ثانيا:عمل عروض فنية جامدة فى كاس العالم فى الامارات
ثالثا:مكتشف معظم النجوم الظاهرة حاليا(متعب وعمرو زكى و عبد ربه وعبد الوهاب الله يرحمه)
رابعا:كاس مصر والسوبر مع المقاولون ولم تات عن طريق الحظ لانه غلب الثلاثة الكبار(الاهلى - الزمالك - الاسماعيلى)
خامسا:بطولة امم افريقيا 2006 مع المنتخب ومحدش يقولى الجمهور والا كان اولى ان المانيا تاخد كاس العالم2006

بعد كل دا مينفعش نقول عليه انه كفتجى
ولو كدة يبقى الاحق ان الجوهرى كمان يبقى عجلاتى
ولا انتم نسيتوا فضيحة مصر مع اليونان والسعودية

ما حدث فى التصفيات من ترنح المنتخب امر عادى
والكثير من المنتخبات بتقع فى التصفيات وبتبقى جامدة فى النهائيات
ومثال على ذلك البرازيل فى مونديال 2002
دخلت كاس العالم بالعافية وكانت مهددة بعدم الدخول
لكنها دخلت واخدت كاس العالم وقتها

يا جماعة مفيش مدرب فى العالم عاوز يخسر
واللى يزايد على حسن شحاتة يبقى اكيد مدعى

الموضوع دا اهداء لyasserbasha2006

صاحب التوقيع الاتى

أيها الوغد المتآمر

لم يخلق بعد من يلوث اسم مصر

و يضعه في التراب

كما فعلت انت و الحشرات من جهازك

[aymanfekry]

حبيبي حسن شحاتة لا يجيد قراءة المباريات ومن ثم بطئ جدا في الفكير اثناء المباريات وايجاد الحلول ، وهي احد المميزات التي يجد ان تتوافر في المدير الفني الكفء

[bobman]

ولكنه ليس بطلا
هل (حسن شحاتة) أكثر وطنية وانتماءً للبلد منى ومنك؟ أكاد أسمعك تقول: ابدأ بنفسك.. حسناً سأبدأ بنفسى.. الإجابة بالتأكيد هى (لا)، (شحاتة) ليس أكثر منى وطنية، ولا يفترض أن يكون هكذا لمجرد أنه المدير الفنى لمنتخب مصر، فأنا والله العظيم ويارب أموت قدامك حالاً لو كنت كذاب، أنا مستعد لتولى مهمة المدير الفنى لمنتخب مصر الآن وفى هذه اللحظة، على الرغم من كل الأعباء والهموم والصعاب والمشاكل والمؤامرات والبلاوى التى يتغنى مديرنا الفنى الوطنى بوجودها، أنا يا سيدى مستعد أتحملها وأتحمل أبوها من أجل بلدى، وطنى، ترابى، ومن أجل أن تكون لدينا كرة مصرية حقيقية، نقدمها لمصر هدية حاجة جميلة ومعتبرة!
أنا يا سيدى مستعد لتقاضى نصف الراتب الشهرى الذى يتقاضاه (شحاتة) من مصر، وذلك حباً فى البلد الذى خيره عليا وعلى الجميع، بل ربع الراتب، والله أقبل بالثُمن كمان، وألمح سؤالاً خبيثاً يرتسم فى عينيك حول أهمية وجود واحد مثلى على رأس الجهاز الفنى لمنتخب مصر، وأنا لم أكن لاعباً شهيراً ولا مدرباً يشار إليه بالبنان، ولا حتى مطرب مغمور يجلس فى المدرجات ليغنى فى الميكروفون أثناء المباريات ثم يتزاحم للظهور فى لقطة تليفزيونية بعد المباراة بغض النظر عن نتيجتها أكانت لصالح فريقه أم ضدها المهم يظهر، أعلم والله شعورك هذا ولدىَّ الرد الجاهز على كل تساؤلاتك الاستنكارية التى تبغى ذبحى بها قبل أن تتمعن فى وجهة نظرى!

يا سيدى إحنا أخيراً صعدنا لنهائيات أمم إفريقيا بعد أن نشف ريقنا وزاغت أعيننا وارتعشت أطرافنا جميعاً وتجمد الدم فى عروقنا طوال مشوار التصفيات الذى قاد (شحاتة) الفريق خلاله، وأستحلفك بالغالى عندك والثمين ألا تردد على مسامعى اللحن الحمضان من عينة أن الكورة الإفريقية تطورت، والفرق الصغيرة تنمرت، والكيانات الكبرى تبعثرت، فبالله عليك لو كان هذا رأيك أرجوك لا تكمل قراءة هذا الكلام وخليك مع عالمية بتسوانا وتأسد بوروندى وبطولة موريتانيا!

[ميدو المان]

المفروض لغه الحوار تكون محترمه شويه عن كده ولما نتكلم عن شخص اى شخص بالسلب يكون نقدنا ليه موضوعى بعيد عن التجريح والالفاظ الغير مقبوله

[بطوط الزملكاوية]

ما فيش فايدة الاهلوية هيفضلوا وراه لغاية ما يشيلوه
و هما مش عارفين ان اصلا سبب وكسة المنتخب هما لاعيبة الاهلي
و اكبر دليل هوه عماد متعب

[h131200]

الله ينور ياعم الحج
الله ينور
موضوعك تمام التمام

[bobman]

ما فيش فايدة الاهلوية هيفضلوا وراه لغاية ما يشيلوه
و هما مش عارفين ان اصلا سبب وكسة المنتخب هما لاعيبة الاهلي
و اكبر دليل هوه عماد متعب

هو المنتخب بيلعب فيه 11 لاعب
والا عماد متعب بس
طب فين عمرو ذكي يا نجم من المنتخب

[ahmednabih]

بص حسن شحاته لا يصلح لتدريب المنتخب
اخره نادى من اللى بينزلو

[solomeso]

موضوع في الجون وخير رد علي الجماعة اللي ملهاش في الكورة

[zizoandonly]

ما فيش فايدة الاهلوية هيفضلوا وراه لغاية ما يشيلوه
و هما مش عارفين ان اصلا سبب وكسة المنتخب هما لاعيبة الاهلي
و اكبر دليل هوه عماد متعب
على فكرة انا اهلاوى
وبالنسبة للعيبة الاهلى
اعتقد ان كان نص منتخب مصر فى بطولة افريقا الاخيرة كانوا منه
ومتعب مش تعبان فى المنتخب بس لكن فى الاهلى ايضا

[MMORTEGA2002]

ما فيش فايدة الاهلوية هيفضلوا وراه لغاية ما يشيلوه
و هما مش عارفين ان اصلا سبب وكسة المنتخب هما لاعيبة الاهلي
و اكبر دليل هوه عماد متعب

حبيبى المنتخب راح من غير لعبية الاهلى افضحوا فى اليابان
وبعدين الاهلوية مالهم انت شايف ان فى مدرب اهلوى هيمسك منتخب مصر فى حالة رحيل حسن كفته
وبعدين ماله عماد متعب غيظط فى ايه عمالك ايه هو علشان بيجيب فيكوا جوان ولا ايه
ياريت ردودك تبقى افضل من كده

[yasserbasha2006]

لا يا بوب الكلام مش كدة

الراجل دة قرايته للمباراة ضعيفة جدا

و تغييراته متأخرة و تفكيره بطئ...و بيصر على ناس ملهمش لازمة

زي هاني سعيد و اصراره على أحمد فتحي في الناحية اليمين

و ربنا بيسترها معاه كتير أوي

فعلا منتخب مصر كبير عليه أوي

لكن للأسف مفيش حد بيستقيل أو يسيب مركزه في الزمن دة

و أدينا هنشوف في كاس الأمم

و لو كنت أتمنى ان تخيب ظنوني

[ibnhazm_906]

إديله يل bobman

كده واحد واحد ......


حسن شحاته لم يصلح أساسا للمنتخب وكأس الأمم كان ليها أسباب كتيرة جدا بعيدة عن كفاءة المدرب يعني من الآخر حسن شحاته مدرب أندية مش منتخبات....

[علاء حمدان]

ما فيش فايدة الاهلوية هيفضلوا وراه لغاية ما يشيلوه
و هما مش عارفين ان اصلا سبب وكسة المنتخب هما لاعيبة الاهلي
و اكبر دليل هوه عماد متعب

لاعبى الاهلى هم وجوزية والجماهير طبعا اصحاب الفضل فى امم 2006 ومتعب كان قناص الاهداف كفاية انه كان بيحط الاهداف اللى المهاجمين امثال حسام وغيره بيلعبوها فى اتجاه خارج المرمى وهو اللى بيعيد توجهها .
والنبى يا بطه خليكى على جنب او ادخولى المطبخ وبلاش كلام فى الكورة والاهلى والحاجات دى
مالك انتى بوجع الدماغ ده

[علاء حمدان]

يا جماعه حسن شحاته مدرب كفء بس المشكله انه اثناء المباراة بيتحول لمتفرج فقط
واكبر دليل تابعوه اثناء المباراة

اعتقد ان كتيير منا بتتفرج وبتأثر بردود الافعال وبتفكر فى انسب حلول للمواقف
لكن الكفتجى بتاعنا بيتفرج وبيشجع الكورة الحلوة ويندب ويلطم للكورة اللى بتضيع وملوش دعوه بالتعديلات او التغييرات

ممكن حد يقولى تغيير واحد قام به الكفتجى وغير بيه شكل مباراة
ومحدش يقولى التغيير بتاع ميدو بعمرو ذكى اللى الحظ لعب فيه دور كبير انا بتكلم على تغيير يغيرخطه

[romio1975]

شحاتة آخرة يدرب فريق درجة تانية