موسوعة الفاجومى الثائر أحمد فؤاد نجم !!!!!!!!!!!!!!

[khaled qes]

http://www.omeldonia.com/../../adminupload/articls/image/f797_1.jpg

حالة فريدة في بساطتها لا تتكرر بين المبدعين فهو على حسه المرهف صورة من رجل الشارع بكل تفاصيله اليومية وبحياته الساذجة الذي أكسبته الطبيعة تلقائيتها وبوعيه الكامل للحياة القاسية التي غلفته والذي عبر بالعامية عن كل أوجه الحياة .

ولد الفاجومى أحمد فؤاد نجم صاحب العينين الخضراوين في "عزبة نجم" بالزقازيق يوم 22/5/1929 توفى والده وهو في السادسة من عمره ، وعاش نجم مع أفقر فقراء مصر من الريف إلى العاصمة في "حوض آدم" بجوار الأزهر الشريف في حي الغورية وهو حي قديم تهدم تماما بفعل الزلزال وقد أعطته الحكومة شقة في منازل الإيواء التي تم توزيعها على المتضررين من الزلزال ، وقد عرف الحياة القاسية منذ صغره ولازمه الفقر حتى الآن بالرغم من شهرته .

وبدا حياته العملية كعاملاً في سكك الحديد في ( 1951-1956) ثم عمل طوافاً بريدياً واكتشف في طوافه حجم القهر الواقع على الفلاحين"، وفي عام 1959 انتقل من البريد إلى النقل الميكانيكي في حي العباسية .

وفى1962 خرج أحمد فؤاد نجم من سجنه ليلتقي بالشيخ أمام عيسى الملحن الفقير الضرير رفيق الطريق وقد عبرا سويا عن كل قوى التغيير في المجتمع في الشوارع في المصانع وبين الطلاب في الجامعات ، وتعاقد الثنائي نجم - إمام على أن يكتب أحدهما وأن يغني ثانيهما وهكذا كانا متلازمين في كل شئ وحتى في السجن اللذان كانا يدخلاه سويا ويخرجان معاً أو منفردين ليعاودا النضال ، وبدأت حياتهما معا في حوش آدم وقد نجحا في إثارة الشعب وحفز هممه قديما ضد الاستعمار ثم ضد الديكتاتورية الحاكمة ثم ضد غيبة الوعي الشعبي، ويقول نجم عن رفيق حياته انه(أول موسيقي تم حبسه في المعتقلات من أجل موسيقاه وإذا كان الشعر يمكن فهم معناه فهل اكتشف هؤلاء أن موسيقى إمام تسبهم وتفضحهم) وقد انفصل هذا الثنائي بعد فترة واتهم الشيخ إمام قرينه أحمد فؤاد بأنه كان يحب الزعامة وفرض الراى وانه حصد الشهرة بفضله ولولاه ما كان نجم ولكن هذا هو القدر أراد أن يحرمنا من ثنائية جميلة أمتعت الجمهور العربي استمرت طوال 35 عاماً قبل وفاة الشيخ إمام .

ويقول احمد فؤاد نجم عن نفسه أنا فلاح مصري مواطن عربي منتهك الأرض والعرض مكبل ومطارد ، أنا حفيد الفلاح الفصيح فلاح مصري فاهم كل حاجة ولا أستطيع أن أبلع لساني ، واحمد فؤاد نجم لا تسطيع فصله عن العالم المحيط وعن المجتمع البسيط وان تدرك مدى حب الناس له من أصدقاءه المحيطين به .

وأحمد فؤاد نجم الشاعر المنطلق المندفع كثيرا والذي لا يخشى القوانين ولا القيود في سبيل قول ما يراه ويعتقد فيه والذي تظاهر للمرة الأولى سنة (1946) وكان لا زال في السابعة عشر من عمره مع (90) ألف عامل مصري ، وقد سجن تقريبا طوال فترة رئاسة الرئيس السابق محمد أنور السادات يقول إن صحراء الوطن العربي انتقلت من الأرض إلى عقولنا فالإنسان العربي متصحر ولا يمكن الإبداع تحت كل هذه الضغوط وترسانة القوانين المقيدة للحريات في الوطن العربي وأنظمة الحكم الفاسدة ويقول عن نفسه انه مجنون لذلك أبدع ولكن ليس كل الناس مجانين و كل إنسان موهوب في اتجاه لكن الخوف والرعب قاتل الناس.

http://www.omeldonia.com/../../adminupload/articls/image/f797_3.gif

ويرى أحمد فؤاد نجم أن العامية أهم شعر عند المصريين لأنهم شعب متكلم فصيح وأن العامية المصرية أكبر من أن تكون لهجة وأكبر من أن تكون لغة فالعامية المصرية روح وهى من وجهة نظره أنها أهم إنجاز حضاري للشعب المصري واحمد فؤاد نجم شاعر متدفق الموهبة فقد ألف العيد من الاغانى والتي تعبر جميعها عن رفضه للظلم وحبه الفياض لمصر واستيعابه الكامل للواقع الأليم .

ويرى الفاجومى إن الثقافة الحقيقية تكون من الشارع والناس وليس من الكتب وبالرغم من ذلك كانت للشاعر المبدع قراءاته العديدة والتي بدأها بقراءة القران الكريم وحفظه وقرأ كتاب "الأمل لمكسيم غوركي" وقرأ معظم كتب المسرح العالمي وعشق المتنبى وببرم التونسي و ابن إياس والجبرتي كما قرأ العديد من الروايات المترجمة لديستوفسكى وتشيكوف ومبدعينا الكبار طه حسين وتوفيق الحكيم وغيرهم. وقال عن فؤاد حداد "لو أنه هناك أكاديمية لشعر العامية المصرية هيكون حداد عميد الأكاديمية" أما عن صلاح جاهين فيقول "أنا أسميه الطفل الإلهي هو مجمع عبقريات وبسيط بساطة الفلاح المصري ومجروح وطفل مثل أي مصري حقيقي وقال عن الابنودى انه يعرف طريقه جيدا وهو طريق السلطة .

وأحمد فؤاد نجم له خمس زيجات وقد سبق له الزواج من صافيناز كاظم وعزة بلبع وسونيا مكويو الجزائرية ويقول عن تعدد زواجاته أنا لم اندم على شئ كل منهن تجربة استفدت منها ، وقد بدأ في كتابة مذكراته والتي تحمل عنوان فاجومى الأول والثاني .


http://www.omeldonia.com/../../adminupload/articls/image/f797_4.jpg

وقد فازت أول أعماله الشعرية والتي تحمل عنوان "صور من الحياة والسجن"بالجائزة الأولى في مسابقة نظمها العقاد وقد كتب فؤاد مسرحيات عجايب - شلتوت العظيم - لولي وغيرها ، وقد عشق فاجومى مصر كما عشقته وعشقه أهلها وقصيدته (يا مصر) التي كتبها من المعتقل في 1970 يظهر فيها هذا الحب والذي يقول فيها :
فلاحينك هما هما
فلاحين رمسيس وخوفو
جيش
لا عيش ولا زمزميه
في الهجيره تبل جوفه
المرض للموت يجرة
وهو ماشي
يجر خوفه
أعمي
سالك سكه عتمه
خطوته
على قد شوفه

[ahmed awaad]

مشكور على المعلومات يا باشا

[khaled qes]

مشكور على المعلومات يا باشا

شكراً على مرورك أخى الكريم
وبالتوفيق وبالنجاح
إن شاء الله تعالى

[khaled qes]

تذكرة مسجون


الاسم : صابر
التهمه : مصري
السن : اجهل اهل عصري
لرغم انسدال الشيب ضفاير
من شوشتى
لما لتحت خضري
المهنه : وارث
عن جدودي
والزمان
صنع الحضاره
والنضاره
والامان
البشره : قمحى
القد : رمحى
الشعر : اخشن م الدريس
لون العيون : اسود غطيس
الانف : نافر كا لحصان
الفم : ثابت فى المكان
واما جيت ازحزحه
عن مطرحه
كان اللى كان
جهه الميلاد: فى أي اوضه مضلمه
تحت السما
على ارض مصر
من أي دار وسط
النخيل
مطرح ما يجري النيل
ما دام ما يكونش قصر
الحكم: من سبع تلاف سنه
وانا راقد سجين
اطحن على ضراسي الحجر
من الضجر
وابات حزين
الاسباب : سالنى سائل
حبستك طالت
وليه
ولانى طيب
وابن نكته
ما فيش مخالفه ركبتها
ضد القانون
لانى خايف
والقانون سيفه ف اديه
تسأل عليّ المخبرين
فى أي حين
تسمع وتفهم قصتي
الف وبيه


الاسم صابر ع البلا
ايوب حمار
شيل الحمول من قسمتى
والانتظار
اغرق فى انهار العرق
طول النهار
والم همى فى المسا
وارقد عليه
عرفت ليه ؟

معتقل القلعه / 1974

[tifa2003]

مشكور على المجهود وارجو منك ارسال اشعار هذا الفنان الجميل علا البريد الاتى tifa20031@yahoo.com لانى بقالى زيادة عن سنة ادور على الاشعار دى ومش لاقيها ولك جزيل الشكر والى الامام دائما

[khaled qes]

مشكور على المجهود وارجو منك ارسال اشعار هذا الفنان الجميل علا البريد الاتى tifa20031@yahoo.com لانى بقالى زيادة عن سنة ادور على الاشعار دى ومش لاقيها ولك جزيل الشكر والى الامام دائما

أولاً مشكور على مرورك
ثانياً لاتدور ولا حاجة وإن شاء الله هبعتلك فى القريب الصفحة الشخصية للفاجومى
ثالثاً يشرفنا وجودك معنا وخلال أيام هتكون كل أشعار فؤاد نجم هنا فى هذا الموضوع

[khaled qes]

هما مين


هما مين واحنا مين
هما الامر والسلاطين
هما المال والحكم معاهم
واحنا الفقرا المحكومين
حزر فزر شغل مخك
شوف مين فينا بيحكم مين

احنا مين وهما مين
احنا الفعلا البنايين
احنا السنه واحنا الفرض
احنا الناس
بالطول والعرض
من عافيتنا تقوم الارض
وعرقنا يخضر بساتين
خزر فزر شغل مخك
شوف مين فينا
بيخدم مين

هما مين واحنا مين
هما الامرا والسلاطين
هما الفيللا والعربيه
والنساوين المتنقيه
حيوانات استهلاكيه
شغلتهم حشو المصارين
حزر فزر شغل مخك
شوف مين فينا بياكل مين

احنا مين وهما مين
احنا قرنفل على ياسمين
احنا الحرب حطبها ونارها
احنا الجيش اللى يحررها
واحنا الشهدا ف كل مدارها
منتصرين او منكسرين
حزر فزر شغل مخك
شوف مين فينا بيقتل مين

هما مين واحنا مين
هما الامرا والسلاطين
هما مناظر بالمزيكه
والزفه وشغل البولوتيكا
ودماغهم طبعا استيكه
بس البركه فى النياشين
حزر فزر شغل مخك
شوف مين فينا بيخدع مين

هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعه ف اوضه
اللى يقول النصر نميس
ينفع تاكسي
يميشي رميس
واللى يقول الفورد يا بيه
اجعص من اجعصها جعيص
واللى يقول جونسون دا حمار
راجل
عقله عقل صغار
راجل تيس
من غير حيث
ينصب الف جنازة بطار
بس اهو راح
وحنرتاح
وحنتنحنج بقي ونقول
يخزب بيته
ويدلق زيته

[khaled qes]

عم السيد


- عم السيد
- سيد ليه ؟
- كل ما يمشي يلقى جنيه
- يعمل ايه
- زي البرق يدوسه فى جيبه
- طب ما يجيبه وياخد بيه
- ياخد أيه
- ننقش له الورد ف منديله
- ودا بيشم
- نعصر له الورد ونسقي له
- شرب السم
- طب احسن حاجه نغنى له
- ترا لرا لم
- فرخه خالتى مباركه
- ما لها
- فيها الخير و البركه
- ليه
- تزمط كل ادان
- ايه
- بيضه ورا اللقان
- هيييه
- خالتى مباركه تاخدها
- هييه
- وتطير على الدكان
- ليه
- تقضي المونه والكمونه
- والينسونه و الدخان
- نعمه جزيله يا حاجه مباركه - فرخه فيها الخير البركه


القاهرة / 1966

[Gelan]

انا بصراحة بحب الشاعر احمد فؤاد جدا
وخصوصا نقده فنانين اليومين دول

[khaled qes]

انا بصراحة بحب الشاعر احمد فؤاد جدا
وخصوصا نقده فنانين اليومين دول

ومين مبيحبش فاجومى
وننتظر مساهمتك فى أثراء الموضوع
شكراً لك رقة مرورك

[khaled qes]

الخط دا خطي


الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية والخط دا خطي
والكلمة دى ليا

[khaled qes]

فات الهوى
فات الهوى سلم علي
بات السهر ساكن عنيه
عاد الهوى بين يوم وليله
وإحنا سوا يا نور عنيه
فات الهوى
آه يا أسمراني
لحظه ما فات لحظك
ناداني
عاد الهوى قام التقاني
زى الهوى
قلبي ف إيديا
فات الهوى
يا واد يا خمري
سلم
وأنا سلمت أمري
عاد الهوى بالشوق يا عمري
يملا السهر والنوم عليّ
فات الهوى
آه يابن عمي
زى الهوا شعلل فى دمي
وأما شكيت الوجد لآمي
ضحكت
وباستني ف عنيه

معتقل القلعه / 1973

[khaled qes]

بهيـة
يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن الارض سمرا و قمرا
و ضفه و نهر و مراكب
و رفاق مسيرة عسيرة
و صورة حشد
و مواكب
ف عيون صبية بهية
عليها الكلمة و المعنى
***
مصر يا امّة يا بهية
يام طرحة و جلابية
الزمن شاب و انتي شابة
هو رايح و انتي جاية
جايه فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية
يا بهية***
الليل جزاير جزاير
يمد البحر يفنيها
و الفجر شعلة ح تعلا و عمر الموج ما يطويها
و الشط باين مداين
عليها الشمس طوافة
ايدك في ايدنا
ساعدنا
دي مهما الموجة تتعافى
بالعزم ساعة جماعة
و بالأنصاف نخطيها
***
مصر يا امّة يا سفينة
مهما كان البحر عاتي
فلاحينيك ملاحينيك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاتب
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية
***
و يعود كلامنا في سلامنا يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى
تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني
1969م

[khaled qes]

رسالة إلى السجن

حبيبي يا مجرم يا سافل
يا دون
يا رب السوابق
يا رد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لان البلد دي
حاكمها القانون
توقع ما بينى وما بين
الحكومه ؟
دي برضك حكومه
وأنا إيش أكون
أديك رحت مورته
وحتروح بشرطه
وحيفسحوك
فى جميع السجون
وأنا مش ح أزورك
كما كنت فاهم
ولا كنت فاهم
ولا يحزنون



القاهرة / 1979

[khaled qes]

جائزة نوبل

شوف عندك يا سلاملم
واتفرج يا سلام
مواطن
شخص عادي
مالوش أي اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
على شقلب يا سلام

لما محانم جيبن يا دخ
زايجة لوبن
يعنى مناحم بيجن
ياخد جايزة نوبل
تبقى النوديا
يعنى الدنيا
ماشيه بتحدف بالمندار
يبقى الشهر اتناشر ساعه
يبقي اليوم
ليلتين ونهار
يبقى القاتل
شخص ضحية
والمقتول مجرم جبار
شفتوا إزاى ؟
أما صحيح الطب اتقدم
وحنا ما وصلتناش أخبار
أيوه يالجنة لوبن بيه
قاعدة ازاى بتلجنى إيه
أنا مش فاهم حاجه صراحه
لما القاتل يا خد جايزه
كده من دون تلبيخ وأباحه
يبقي
يا إما اللجنه دى بايظه
أو لا مؤاخذه
رئيسها حمار
يبقي يا لجنه يا عره يا كوسه
جتنا وجتكو ستين حوسه
يبقي ف هذا الزمن المايل
ياما حتجري علينا هوايل
تبقي اللكلمه بدل الكلمة
والكاتب يمسك منشار
يبقي الراعش
يعنى الشاعر
يسكن شقه ف بيت
فى قصيده
يكتب فول
ياكل أشعار

[khaled qes]

الغربة

يا غربة روحي روحي
لاتحطي على سطوحي
وسطوحي يطلع فدان
والفدان يحتاج مروى
والمروى عرق الإنسان
والانسان
يحتاج ثروة
والثروة فى غيط الفلاح
والعامل صاحب المفتاح
والمفتاح يفتح جنه
والجنة فيها الحنه
يا حنه يا محنيه
عشقوكي الجناينية
زرعوكي خضرا خضرا
م البدره للقطفيه
وعجنوكي حمرا حمرا
للسمرا والخمريه
والسمرا طرحت بستان
والبستان لابس فستان
والفستان طاقة طاقة
أحمر أخضر يا رفاقه
ورفاقي يا كل الناس
من كل الناس و الاجناس
ع الجنة واقفين حراس
والحنه على سطوحي
يا غربه روحي
روحي

القاهره / 1967

[khaled qes]

موال فلسطيني مصري
يامه مويل الهوي
يامه موايليا
طعن الخناجر ولا
حكم الخسيس فيا
الصبر حلم العواجز
يطرح زهور الأماني
والقهر عدى الحواجز
وأنا إللي واقف مكانى
شايف غيطان البشاير
خايف . وكانن إديا
حتى الحمام إللي طاير
ما رضيش يرفرف عليا
يامه مويل الهوي
يامه مويليا
طعن الخناجر ولا
حكم الخسيس فيا

سألت شيخ الطريقه
ما رضيش يجاوب سؤالي
ودارى عني الحقيقه
وفاتني حاير ف حالي
سألت شيخ الأطبا
دوا الجرح إللي بيا
نظر لي
نظره محبه
وقال دوايا بايديا
يامه مويل الهوي
يامه مويليا
طعن الخناجر ولا
حكم الخسيس فيا

يامصر
وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي
عندك دوايا
علمني حبك عباره
سهله
وبسيطه
وعفيه
شرط المحبه الجسارة
شرع القلوب الوفية
يامه مويل الهوي
يامه مويليا
طعن الخناجر
ولا
حكم الخسيس فيا

[khaled qes]

أصل الحكاية .... ولد

منين أجيب ناس لمعناه الكلام عارفين
سبه الأمارة
إذا حفضوا الوداد
عارفين
شرعت من القلم رمحي
جرح قمحي
جعلت عشق الغنا زادي
وناس عارفين
يا ليل يا عين يا وطن
يا صحرا يا بساتين
يا جرحي
يا غنوتي
يا ناسي يا غايبين
موالى من غربتي أخضر
خضارة حزين
حزين كلام الغنا
والسامعين عارفين
آه يا زمان الخنا
يا ماشي بالمعكوس
فيك أى شئ ينشري
وكل شئ
بفلوس
حطيت عديم الرجا
ع الخايب المتعوس
خراب
وحاكم أغا
يا قهرة العارفين
ركب الأغا ع البلد
ركب عليها الخوف
خاين قليل التنا
جاهل
عديم الشوف
خان التراب والهوا
خنق الضمير في الجوف
وداس بنعل الوطا
ع الحق
والعارفين
مين في البلد يا بلد
كان صوته من راسه
يحسب
يكيد العدا
ويصون وداد
ناسه
دار المدار بالخبل
وسقانا من كاسه
مين تحت الأغا ينطق
يقول عارفين
يا للي قريتوا الجرايد
كله كلام مغشوش
ومركبين في الصحافه
بتوع
وليها كروش
يدوسوا زر البتاعه
ينزل كلام مطروش
حمضان في حبر المطابع
وكلنا عارفين

أصل الحكايه ولد
فارس ولا زيه
خذ من بلال ندهته
ومن النبي ضيه
وم الحسين وقفته
في محنته
وزيه
قدم شبابه فدا
والحق له عارفين
خالد
يا بن الربيع والأمل
والشمس والزينه
مين يا فتي أعملك
فعل الخريف فينا
وكبرت بره الزمان
اللي ابتلاك بينا
نايمين على وددنا
مع إننا عارفين
صالح من سكون الخرس
كروان بغنيوه
الملك لك يا فتي
يا مصري يا حليوه
رقصت نجوم الفلك
بالضي تتعانق
والشمس ويا القمر
في برجهم
عارفين
شيل الغطا يا عطا
عبد السلام قدد مين
عبد الحميد يا فتي
قطب الرجال يا حسين
داعي المروءة دعي
والعمر مش عمرين
خالد يقول صحبتي
واحنا الجميع عارفين
الله أكبر هنا
ع الباغي والجبار
طعن الفتي طعنته
خار الأغا وانهار
المجد دا ابننا
والفارس الكرار
راكب على مهرنا
والكدابين عارفين
مين يا فتي علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم
على زندك
الأسم : خالد
ولكن
عاشق
ولك هندك
أم الدلال علمك
طبع الأسود عندك
مين يا فتي علمك
عشق الملاح والميل
هندك يا أدهم هنا
أصلك وسلسالك
والناس يا خالد هنا
عمك
هنا
خالك
يا غنوه من قهرنا
إسمك وموالك
ويا العذاب والأمل
فى دمنا
عايشين
وليه أجيب ناس
لمعناه الكلام عارفين
وإحنا الأماره
إذا حفضوا الكتاب
عارفين

[khaled qes]

على الضريح

السكه مفروشه
تيجان الفل والنرجس
والقبه صهوة فرس
عليها الخضر بيبرجس
والمشربيه عرايس
بتبكي
والبكا مشروع


من ذا إللي نايم وساكت
والسكات مسموع
سيدنا الحسين ؟
ولا صلاح الدين ؟
ولا النبي ؟
ولا الإمام ؟
دستور ياحراس المقام
ولا الكلام بالشكل ذا ممنوع ؟ !
على العموم
أنا مش ضليع
في علوم الانضباط

أبويا كان مسلم صحيح
وكان غبي
وكان يصلي ع النبي
عند الغضب
والإنبساط !
أبويا كان
فلاح تعيس
فى ليله ظلمه
خلفوه
وف خرقه سودا
لفلفوه
وف عيشة غبرا
طلعوه
وف عشه ما يله
سكنوه
ولصموه
وطلسموه
ودجنوه
وجهزوه
وجوزوه على عماه
فكان محير في هواه
ما بين أمي وما بين الجاموسة

وكان يخاف
يقتل ناموسه
وكان خجول
خجول
خجول
لكنه كان دايما يقول
أستغفر الله العظيم
من باب الاحتياط !
أبويا طلعتوه حمار
فكان طبيعي
يجيبني جحش
لا أعرف نبي
من أجنبي
ولا مين ما جاش
ولا مين ما راحش
موسى نبي
أبوه نبي
عيس نبي
أبوه نبي
كمان محمد كان نبي
ويا قلبي صلي ع النبي
وكلنا نحب النبي
وكل وقت وله أذان
وكل عصر وله نبي

وإحنا نبينا كده
من ضلعنا نابت
لا من سماهم وقع
ولا من مرا شابت
ولا انخسف له القمر
ولا النجوم غابت
أبوه
صعيدي وفهم
قام طلعه ضابط
ضبط
على قدنا
وع المزاج ظابط
فاجومي من جنسنا
مالوش مرا عابت
فلاح
قليل الحيا
إذا الكلاب سابت
ولا يطاطيش للعدا
مهما السهام صابت
عمل حاجات معجزه
وحاجات كتير خابت
وعاش ومات وسطنا
على طبعنا ثابت
وإن كان جرح قلبنا
كل الجراح طابت
ولا يطولوه العدا
مهما الأمور جابت

[khaled qes]

بيان هام


هنا شقلبان
محطه إذاعه حلاوه زمان
من القاهرة
ومن كردفان
وسائر بلاد العرب
واليابان
ومن فنزويلا
وايضا ايران
ومن أي دار
او بلد مستباحه
بفعل السياحه
مع الامريكان
هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر
وتليفويونات
وخطبا ف جوامع
وجبنه وزيتون
ونفزح ونركب جميع الموجات
ونبحث ونفهم
فى كل الشئون
واديما نلعلع فى كل الحالات
ولا حد سامع
ولا يحزنون
وتمسع ما تسمع
دا ما يهمناش
لان احنا اصلا
بناكل بلاش
فخليك فى نفسك
وما نخليناش
نسلط عليك القلم
واللسان
هنا شقلبان
محطه اذاعه حلاوه زمان
يسر الاذاعه
وما يسركوش
بهذي المناسبه
وما بندعيكوش
نقدم اليكم
ولا تقرفوش
شحاته المعسل
بدون الرتوش
شبندر سماسره بلاد العمار
معمر جراسن للعب القمار
وخارب مزارع
وتاجر خضار
وعقبال املتك
امير الجيوش
ما تقدرش تنكر
تقول ما اعرفوش
ما تقدرش ايضا
تقول ما اسمعوش
شحاته المعسل
حبيب القلوب
يزيل البقع
والهموم والكرب
يا نفس
يا فين
يبلغ حبوب
ويفضل يهلفط
ولا تفهموش
وتفهم ما تفهم
دا ما يهمناش
لان انت فاهم
وعامل طناش
ح تنكر وتحلف
ح اقول لك بلاش
ح تتعب دماغنا
وتتعب كمان
هنا شقلبان
محطه اذاعه حلاوه زمان
لان المخبى ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبيه
وعن كيت وكان
وعن محسوبيه
وعن العبان
ظهر فى المدينه
كانه الطوفان
وغرق مراكب
وسوح غيطان
وبعض المراكب
ح تغرق كمان
وازمه مساكن
وازمه امان
وعالم بياكل
فى عالم جعان
وريحه مؤامره
فى جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما ابلغونا
جميع الودان
لهذا وذاكا ... وتكلم كمان
نقدم اليكم
عروسه وحصان
شحاته المعسل
وهذا البيان
هنا شقلبان
محطه اذاعه حلاوه زمان
بسم الله
سلام عليكم

وسلمون وموز
واما المسائل
فهنجف ولوز
فيا اخوتى
ويا اخوات
اليكم بيانى
كما هو ات
جميع المسائل
تمام التمام
وكل الكلام دا
مجرد كلام
فصيرا جميلا
ولا تقلقوش
وشغل الضغاين
انا ما اقبلوش
ما فيش أي حاجه
على الطلاق والعتاق بالتلاته
ما فيه أي حاجه
وقدر كمان ان فيه أي حاجه
ما فيش أي حاجه
ما لوش أي لازمه الكلام
واللجاجه
وعيب ان عيل يسوق السماجه
ويعمل ديباجه
انا بطبعي ضد السماسره الكبار
بحكم المنافسه
وحكم الجوار
لكن مش ف طبيعي
انى اعمل فضيحه
لو احد زميلي
هبش كام صفيحه
ما كل الزمايل
بتهبش صفايح
وكل اللي جاي
مش زي اللي رايح
فيا ايها الشعب
صهين تفعلص
مساء التنفس
مساء الرويح
اخويا الامير بزرميط الايرانى
بعت لي السنه دي
عزمنى ودعانى
انا قبلت طبعا
ورحنا العزومه
وكانت وليمه
ما تحصلش تانى
دا ايه المحمر
وايه المكمر
وايه المشمر
وايه الصوانى
انا دماغى تعبت
ولفت صراحه
من الفخفخه
واهنا الاصفهانى
هناك يعنى مثلا
اذا شربت طافيه
تمز بكوارع
وبسطرمه ضانى
ما شفتش هناك
ناس بتحقد عليهم
ولا ناس بتشتم
فلان الفلانى
لانه اشتري عزبيتن
من شطارته
وحكمه ادارته
وطلع مبانى
وبعد الواليمه استلمنا الهدايا
مفضض
ومدهب
وقز وقيشانى
وطبعا اخويا الامير
قال لى حاجه
ح اقوالها لكو طبعا
اذا الوقت ناسب
ح تطلع لى عيل
بدون أي حاجه
ويعمل لى فلحس
ويقعد يحاسب
دا حقد اشتراكى انا ما اقبلوش
ولو هو ابنى انا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه
وعايزين اسيب البلد
من زمان
وانا مش ح اسلم
واسيب الامان
ولابالبوليس والنيابه كمان
فيا ايها الشعب
كمل جميلك
وصبرا
واذلم حتيجى المصاري
وتاكل وتشرب
تبع ما ياتيك
وتغرق فى بحر العبيد والجواري
وترسم حياتك
حسب ما يرائيتك
وتملا الحواري
فساقى وقصاري
تسبح بحمدك
وتشكر جميلك
وفضل الزباله
وطفح المجاريه
ختاما سلاما
واخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتى رئيسا
وابا
وجوز

[khaled qes]

حلقه ذكر
مواكب مواكب
رجال الطريقه
يفوقوا الكواكب
بنور الحقيقه
منهم أسارى الليالي السهارى
يعينوا الخلايق
على أمر دينهم
ومنهم سكارى المحبه الحيارى
فى بحر الحقيقه الغريقه
ومنهم
الله حي
الله حي
وسع سكه يمر الضي
شيخنا العاشق
جي وراشق
سهمه وماشي حدي بدي
يا سيد يا بدوي
يا سيدنا الحسين
مدد يا أم هاشم
يا كحل العينين
مولانا الرفاعي
يا طب الأفاعي
يا سيدي ابراهيم الدسوقي
إنت فين
با نادي عليكو
يا أهل الطريقه
وجوايا شوق
للغزل والحقيقه
وبرايا عالم
مشعلل حريقه
فزعني ولسعني
وكوى قلبي كي
الله حي الله حي
**
أنا عشقت سلمى
وغانم غواها
وانا لما باعشق
ما برجعش اتوب
تاخدنى المعاصى
آدم جدي عاصى
وأنا راضع معاصى
وشبعان ذنوب
ولو قالوا
عشق المحاسن خطيه
ألم الخطايا
وأفوز بالعطية
وأسافر بحلمى
سعيد المطيه
عزيز الخطاوي ما يلويني شي
وغانم يا سلمى
يحب السلامه
ولجل المغانم
يبيع العمامه
ويبعد ويقرب
ويعشق لمأرب
وفى الجد يهرب
ليوم القيامه
وأنا اللي فى هواكي
سبقت المعاد
يا سلمى
يا عشق البنات والولاد
وطلعت صورتك
فى كل البلاد
وكبرت فيها الأمل
فى اللي جي
الله حي
ياسيدنا الأمام
يا حسين يا شهيد
وهلبت عالم
ورأيك سديد
لمين ود سلمى
فى شرع الطريق
ومين القريب ومين البعيد
ومين اللى باقي
ومين اللى زايل
ومين اللي شايل
ومين اللي طايل
ومين إللي يثبت
فى وقت الهوايل
ومين فينا ميت
ومين فينا حي
الله حي
غانم رايح عاشق جي
شيخنا الشايب
ماشي وسايب
كلمة بسيطه لأهل الحي
كل ماتمشى قدم ع السكه
كل السكه ما تشبع ضي
الله حي الله حي
فوت فى السكه
تشوف الضي

[khaled qes]

منشور وطني علني رقم 1
أيها المواطنون
أيها المواطنات
مصر من طول السكات
بتناديكم
تسمعون ؟
عطروني بالبارود
كحلوني باللمون
عايز اغمض
أو أفتح
يرجع الشوف للعيون
والقى سينا جوا حضني
والجناين والزتون
يا حبايبي
يا جنودي
ما عساكم تفعلون


يحكي من أمثال زمان
كل وقت وله أذان
يا بهيه وخبرينا
يعني إيه
معني الأدان ؟
لما نصحى فى الصباح
والخلايق مجروحين
تبقي حي على الكفاح
والسلاح يا مظلومين
واما نصحى بالسلام
والخلايق مرتاحين
تبقي حي ع الكلام
والمناقشه يا أفلاطين

أيها المواطنات
مصرنا
ست البنات
عايزه منكو
تزوقوها
وإنتو أهل المكرمات
عايزه عقد النصر وردي
والحلق بالدلايات
عايزه طرحه وعايزه فرحه
وعايزه ساعه م الساعات
تعجنوا الحنه السويسي
من زتون البيارات
ما عساكن فاعلات

أيها المواطنات ؟
يا حياة الشعب يا
مصريا
نور العيون
الحياه والممات
والمشانق والسجون
والكلام والآلام
والدساتر
والقانون
والعساكر
والدساكر
كله فى حبك يهون
ليس فينا من جبان
ليس فينا يحزنون
فينا طيبه
زرع طيبه
بس آه لو تعلمون
لو يفيض الصبر بينا
تطفح النار م الأتون
لو يغطي الصعب سينا
والعبور
يصبح جنون
نرمي يا مصر العزيزه
جسمنا فوق المنون
وإنتي يا مصر الحبيبه
عندنا جوا العيون
وإحنا يا مصر الجميله حبنا
فوق الظنون
القاهرة / أكتوبر 1973

[khaled qes]

الممنوعات


ممنوع من السفر
ممنوع من الغنا
ممنوع من الكلام
ممنوع من إلاشتياق
ممنوع من إلاستياء
ممنوع من إلابتسام
وكل يوم فى حبك
تزيد الممنوعات
وكل يوم باحبك
أكتر من اللى فات
حبيبتي يا سفينه
متشوقه وسجينه
مخبر فى كل عقده
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك ألربيع
أعود كما الرضيع
بحرقه الفطام
حبيبتي يا مدينه
متزوقه وحزينه
فى كل حاره حسره
وف كل قصر زينه
ممنوع من إني أصبح
بعشقك .. أو أبات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم باحبك
أكتر من اللى فات


القاهره / 1976

[khaled qes]

على الربابة


أصلي ع النبي قبل البداية
نبي عربي مشفع فى البرايا
واسلم بالوتر والقوس عليكم
ياكل السائرين ع الشوك معايا
يقول الشاعر المجروح فؤاده
من الاندال
ومن دق الرحاية
غرامي بالحروب يسبق كلامي
وآملي فى الشعوب
يخلق غنايا
وعشقي للكلام
غالب سكوتي
وكرهي للسكات
جالب شقايا
يقول ابن العرب
والجرح نازف
صديد الذل
ودموع السبايا
ونار الغل
من أيلول ويونيه
وريق المر من طعم الرزايا
رضانا بالقليل والخوف
رمانا
لحكام المواكب
والهفايا
وبيع الأرض بالعرض لعدوي
على عينك يا تاجر فى المرايه
وايه بعد المسيرة الهاشمية
على درب الخيانة للنهاية
**
يا شعب العرب
يا ابن الفوارس
يا رافع للنضال بيرق وراية
يا واهب للزمن
أيام وضية
بنور البذل
والجود والعطايا
صلاح الدين
ينادي من منامته
على النايمين
على دم الضحايا
لاأنا منكم ولا إنتو من ولادي
إذا رضيتم
بغير النصر غاية
ولا غير السلاح فى الحرب
يحكم ويحسم
فى المشاكل والقضايا


سجن الاستئناف / 1973

[khaled qes]

رساله رقم 1


كل ما تهل البشاير
من يناير كل عام
يدخل النور الزنازن
يطرد الخوف
والظلام
يا نسيم السجن ميل
ع الشجر وارمي السلام
زهر النوار
وعشش فى الزنازين .. الحمام
من سكون السجن
صوتي
نبض قلبي
من تابوتي
بيقولولك يا حبيبتي
كلمتي
من بطن حوتي
سلمى لي ع الحبايب
يا حبيبتي
سلمى لي
كل حب
وله نصيبه من سلامي
بلغي لي
احضنى العالم عشاني
بين عيونك
وابعتى لي
نظره
منها اشوف حبايبي
واشفي قلبي
واساليلي
كل عالم فى بلدنا
كل برج وكل مادنة
كل صاحب من صحابنا
كل عيل من ولادنا
حد فيهم شاف علامه
من علامات القيامه
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها
نومه
تلعن الجوع والمذله
والمظالم
والحكومه ؟
سلمى لي ع الولاد السمر
خضر العمر
فى عموم الحواري
سلمي لي ع البنات
المخطوبين فى المهد
لسرير الجواري
واساليلي بالعتاب
كل قاري فى الكتاب
حد فيهم
كان يصدق
بعد جهل
بعد موت
ان حس الشعب يسبق
واي صوت
هى دي مصر العظيمه
ياحبيبتي
هى مصر
اللي فضلتى ف هواها
عشنا
على الف قصر
هى دي يا عزة
مصر

معتقل طره / يناير 1977

[دكتور الجروح]

مشكووور أخوي

[elke ithaler]

ich liebe ahmad und imam

[ابوالقاسم]

والله لا اجد كلمات للرد على موضوعك دائما معطاء
بارك الله فيك

[مصطفى قطورة]

الف شكر مشرفي العزيز خالد .

[عصفورة النهار]

مشكور اخى خالد

[shaheer-naar]

جميل جدا
والشاعر اجمل

والبساطه لا تمل

شكرا لك اخي على هذه القصه الرائعه
من حياه واشعار

شاهر

[nedlaroun]

ich liebe ahmad und imam
Guten Tag elke ithaler

willkommen auf bramjnet

[المعلم ابو دومه]

يا سلام عليك يا باشا
موضوع روعه و الله
فعلا شعر جميل و كلام بسيط
فعلا بيفكرنى بنفسى فعلا
و بتثبيتك للموضوع الجميل ده
باعتبر نفسى ان كل الشعر بتاعى عندك متثبت

[hazi_mazi]

فين يا خالد باقى القصائد

[mocca102]

بجد مش عارف اشكرك ازى
يا ريت باقى القصائد
وياريت اكتر تكون فى كتاب

[aleemon]

مش عارف حاسس اني شوفته علي قناة دريم قبل ذلك!!!

[mousmoum]

شكرا للجميع أقدم لكم أجمل قصيدة للشاعر و بصوتته اسم القصيدة عزة لكن لا أعرف كيف أحملها

[mido45_76]

يعيش الفاجومى احمد فواد نجم امد ت الله فى عمره

[great6ypharaoh]

لست وحدك من يعجب بهذا المصرى الاصيل ولكن اين باقى دوواوينة جزاكم الله كل الخير؟

[hamadax4]

بارك الله فيك


بصراحه رائع رائع رااااااااائع



لكن ليه توقفت ؟؟؟


اتمنى نشوف الباقي قريب باذن الله

[Hamada Alex]

رائع وممتاز وهذا الشاعر انا عن نفسي بموت فيه

[aboo_sala7]

شكرا على الموضوع الرائع ، ويستحق أن يثبت .

[hamada 2008]

مشكوور على الاشعار والمعلومات