حوار بين واحد كسبان وواحد خسران(مهم جدا) الحلقة الاولى

[whyiloveyou]

بسم الله الرحمن الرحيم
أنا ناوى أشرح لكم شرح بسيط إزاى تكسب لو عندك موقع أو مدونة.وهيبقى الشرح ده على مواضيع متفرقه وهتلاقوا فيه نقاط كويسه وإجابات بس هعمله على هيئه حوارات حتى يعنى يبقى دمه خفيف
ليا 2 صحاب واحد خسران ومبيكسبش حاجه من على النت وواحد بيكسب
الأول أعرفكم بأخونا الخسران:واحد إتولد لقى نفسه بيخسر وعمره ماكسب فى حياته.
وأخونا الكسبان:واحد إتولد لقى نفسه بيكسب بس للأسف مبيبصش للخسران.
نبدأ الحوار::::

خسران: لسا برضه مش عايز تقول لى إزاى بتكسب من على النت ياكسبان ..براحتك ياعم بس هيجيى يوم وأبقى بيل جيتس..مع الأعتذار طبعا للكسبان أوى أوى أوى (بيل جيتس)

كسبان:هتعمل إيه يعنى ياخسران؟

خسران: ده أنا بعمل عمايل بس ايه زى الفل...عملت مدونه على بلوجر ورحت على موقع واحد ابن حلال وعملت باست وكوبى على شوية مواضيع عن الفوركس على كام موضوع عن البنوك..على كام موضوع ومقال من اللى فيهم فلوس دول..ورحت نقلهم فى موقعى ..وطبعا أشتركت في جوجل أصل انت مش عارف ده مواضيع الفوركس دى فيها سعر الضغطة ايه...حوالى كدا دولار أو يمكن أكتر...حتى دا أنا بقالى 3 سنين ونص وكسبت 3 دولار و 2 سينت!!!!

كسبان: وبعدين ياخسران؟

خسران: طبعا بعد كده تيجى بقى الخبره وتلعب دور كبير فى الموضوع...يعنى طرق إشهار الموقع...أنا مثلا بكتب اللينك بتاعى فى التوقيع...شوف بقى كام واحد هيدخل..بتاع 30 واحد كده كل يوم!!!

كسبان: سعر ضغطة ايه بس ياخسران..هو انت لسا متغيرتش لسا..ده انت قديم أوى ياجدع..هو كل أما واحد يعمل مدونة ولا موقع هيحط فيه موضوعين مش بتوعوه ويقول لى موقع...ده على كده بقى هتدخل بعد 3 سنين هتلاقى النت بقى مواقع فوركس تدخل على أى موقع تلاقى فيه إعلانات فوركس...تدخل على برامج نت تلاقيه برامج فوركس...تدخل على الياهو تلاقى الناس كلها بتتكلم على الفوركس..ده غير بقى لما تصحى بقى من النوم...وتشرب لك كباية فوركس على النوم..وياسلام بقى لو ضابط المرور شافك وإنت كاسر إشاره ولا بتسوق بسرعه..أول سؤال هيسأله لك هو انت فوركس ياابنى؟ ..وصدقنى لو قلت له فوركس هيسيبك بس هياخد العربيه!!! وبعدين 30 واحد ايه بس دول حتى لو دخلوا..ده قبل مايدخلوا هيطلعوا هو موقعك فيه حاجه مفيدة أساسا....وبعدين..كمل؟

خسران: مقولكش بقا...ده انا عامل حاجه بس نار ناااار...عامل مجموعة أنا وشويه من صحابى الأنتيم إسمها (إضغط بس إوعى حد يشوفك) المجموعه دى بقى فيها 20 واحد فاضيين أوى ودى أحسن حاجه فيهم (إنهم فاضيين يعنى)
كل واحد يقوم من النوم بدل مايغسل وشه يضغط على إعلانات جوجل فى مواقع صحابه الحلوين..وطبعا ضغطه من ده وضغطه من ده كل واحد يعمل له 20 سينت فى اليوم...يعنى حوالى كده يعنى 6دولار فى الشهر ..وأول ما وحد يوصل لم100 دولار يطلب حسابه على طول....بس كنت عايز أسئل سيادتك سؤال...أنا كنت طلبت شيك ب150 دولار من حوالى 10 سنين ولسا موصلش...هو فيه ايه؟

كسبان: يارب صيرنى...ضغطات ايه بس ياراجل...يامحترم....ومجموعة ايه بس اللى إنت عاملها..ياخسران حسابك إتقفل من 15 سنين...والشيك اللى إنت مستنيه ده مش هيوصل....
لو بجد عايز تشهر موقعك فيه طرق كتير...أول حاجه المحتوى يكون كويس..يعنى اللى يدخل يلاقى حاجه تفيده...
يعنى ايه يدخل يلاقى حاجه تفيده..يعنى مثلا لو كتب فى محرك البحث جوجل..عنب يلاقى عنب..مش يلاقى بطيخ..يعنى لو موقعك عنب وهو بيدور على عنب...ولقى موقعك أكيد هيدخل ولما يدخل الموقع بتاع سيادتك يلاقى اللى هو عايزه..ولما يلاقى اللى هو عايزه...هيقعد فى الموقع ...ولما يلاقى موقعك فيه حاجات كتير....هيدور ويدور...ولما يلاقى اعلانات جوجل مرتبطه بالموقع بتاعك ويعجبه اعلان هيضغط ..ولما يضغط هتكسب ولما تكسب هيبقى المكسب عالى ...


خسران: أقولك على حاجه بس متقولش لحد...أنا ياكسبان مشترك فى مواقع تبادل الزيارت اللى هيا ...traffic exchange ..وطبعا مشترك فى auto surf منها...يعنى وأنا نايم الناس بتيجى لموقعى...وبرجع ألاقى العداد هينفجر من كتر الناس اللى جات الموقع...بس المشكله إنى مبكسبش منها برضه...مش عارف ليه ممكن تقول لى؟

كسبان: ماهو إنت بتبقى نايم...واللى دخل موقعك ده كمان نايم..يعنى ولا هو بيشوف موقعك ولا إنت بتشوف موقعه...هو بيشغل الأوتو سيرف بتاع الموقع وإنت بتشغل برضه وأهو انت بتدخل مثلا على 100 موقع وغيرك برضه بيدخل على ال100 موقع..بس مفيش حد بيشوف موقع التانى...قول لى ياكسبان..هو انت مسجل موقعك على محركات البحث؟

خسران: لا...ايوه...لا لا مش فاكر..


كسبان: بعد ماتعمل الموقع أو المدونة وتعمل محتوى كويس...سجل ياخسران موقعك فى محرك البحث جوجل وام اس ان والياهو والألتافيستا..وسيبك بقى من واحد عامل لك سكريبت فى موقع بيقولك إكتب موقعك وأنا أنشره لك فى 600 ألف محرك بحث..سيبك من الكلام ده...
استنى ...قبل ماتسجل خد الموقع ده www.wordtracker.com الموقع ده عباره عن موقع بتاع keywords


خسران:ايه ال keywords ديه؟


كسبان: لك حق ماتكسبش ...دى الكلمات اللى هاتكتبها فى جوجل لما تسجل علشان لما يجيى حد يبحث عن موضوع فى موقعك يلاقيه...أدخل بس على الموقع ده وسجل بأيميل (هيبعت لك لينك على الميل..هتفتحه..ولو بتعرف تفك الخط فى الإنجليزى إدخل...لو مبتعرفش...ياريت تشيل من دماغك فكره المكسب من على النت دى خالص..علشان هتتعب وخلاص
المهم اكتب أهم 3 كلمات فكرة موقعك بتتكلم عليهم...وكمل ...لو متعلمتش محدش هيعلمك..


خسران: ممكن أعرف ايه الميتا..ايه الرانك...وايه s.e.o ؟


كسبان: ده موضوع يطول شرحه انا هفهمك واحده واحده..بس قول بقى ايه اللى انت هتعمله من أول النهارده ياخسران علشان ربنا كدا يكرمك ويهديك وتكسب..


خسران: محتوى كويس ..موقع مرتب...موقع فيه حاجات كتير وخدمات لها فايده للناس اللى بتدخل...هحاول اتعلم ازاى اضع موقعى فى محركات البحث...وأخلى اللى داخل الموقع مايدعيش عليا..هههه


كسبان: أهو كدا تمام ياخسران وأنا معاك واحده واحد


خسران : أنا عندى سؤال والنبى ياكسبان تجاوبنى عليه...هو ليه الناس اللى بتعرف مبتقولش للناس اللى متعرفش؟وليه (جولد) وشويه ناس معاه هما اللى شغالين تمام وبيكتبو مواضيع كويسه والكبار نايمين

كسبان : ربنا يهديهم ياإبنى أصل اللى عدى عدى خلاص ياعم...هيبصلك ليه بقى....وبجد لما اللى إنت تتعلمه من نفسك أحسن من اللى إنت هتتعلمه من غيرك..ده مش معناه ان الواحد يبقى مع نفسه فى الدنيا...بس قصدى علشان تلاقى وتكسب لازم تتعلم وتخطأ وبعدين تتعلم وعلى رأى ال مثل اللى بيقول (ولا بلاش أصل حد يزعل منى)هههه...عموما أنا معاك خطوه بخطوه على أد خبرتى برضه(المتواضعة)


خسران: شكرا ياكسبان على التوضيحات دى .وربنا يهدى


جميع حقوق الطبع محفوظة لwhyiloveyou


محتاج رأيكم ...عاجبكم موضوع زى كده ولا أسكت أحسن:smailes77:



إلى اللقاء فى الحلقة القادمة

whyiloveyou

[goldrights]

Why i love you ?
لانك بجد انسان اكثر من رائع وتستاهل كل الحب
موضوعك فى قمة الروعة ويلمس الحقيقة بشكل جميل ومقبول ويصل سريعاُ الى القلب
هذة هو ادب السخرية يجمع ما بين البساطة وسهولة وصول المعلومة وتحقيق هدفها وتركيزها كمان
وبالفعل كلامك صحيح مئة فى المئة ويالايت نوفر الجهد فى فتح مواقع عقيمة عديمة الفائدة تستنفز وجد وجهد ونركز فى بناء موقع متكامل بمحتوى جيد لا قص ولصق
مشكور اخى وفى انتظار الحلقات القادمة بفارع الصبر

[goldrights]

وياريت تكون فعلا صحوة بقا للناس اللى شغالة قص ولصق ولتعلم ان دا هايضيع وقتها اكبر واكتر من بناء موقع جيد ذو محتوى

يعنى واحد اخذ يوم فى عمل موقع نظام قص ولصق واشترك فى جوجول وبعد 18 يوم قفلت الحساب ثم اتعقد واعاد المحاولة واخذ يوم تانى قص ولصق واشترك فى جوجول وبعد كام يوم خايف هايتقفل او لا

ولا واحد قعد 15 يوم يبنى موقعة بمحتوى جيد حقيقى واشترك فى جوجول واستمر معة الحساب
ايهما افضل
وياريت الناس البكار فى المنتدى فعلا وهم كثيرة جدا لما تشوف موقع بالشكل دا تتكلم تناقش وتحاور تطرح افكارها ولتعلم انها اصبحت كبيرة فى المقدار لدينا واى كلمة منها هايكون لها رنين خاص جميل فلا تخذلونا ونحن لم نخذلكم ونقدركم اعلى تقدير
لتكن صحوة بناء من اخونا
whyiloveyou
وانا اول من اضم لة
فهل من مزيد

[محمد عبد الصالحين]

رائع رائع رائع رائع رائع
بل هو هو اكثر من رائع
بارك الله فيك وجزاك الله كل خير
بجد موضوع روعة
وانا فى انتظار الباقى

[Bo0o0o0ha]

لذيذ أوى اسلوبك وبجد فهمت حاجات كده الواحد مكانش فاهمها قبل كده زى ال_keywords ويا ريت متقفش بقى ونشوف الحلقات التانية

[chips2]

شكلها قصة زي مغارة علي بابا واربعين حرامي

[majdy123]

حوار مشوق ومفيد ورائع جدا ........كمل منتظرين الجزء الثاني

[مكناسي]

شكرا لك اخي ولك كل الحب والتقدير.
ونت كشفت هنا عن 3مواهب.
موهبة ادبية وموهبة في التجارة الالكترونية وموهبة إيصال المعلومة.ماشاء الله عليك

[whyiloveyou]

شكرا لك ياجولد...محمد عبد الصالحين وطبعا مكناسى ولكل الأعضاء على المرور

إلى الأمام دائما.......

[whyiloveyou]

Why i love you ?
لانك بجد انسان اكثر من رائع وتستاهل كل الحب
موضوعك فى قمة الروعة ويلمس الحقيقة بشكل جميل ومقبول ويصل سريعاُ الى القلب
هذة هو ادب السخرية يجمع ما بين البساطة وسهولة وصول المعلومة وتحقيق هدفها وتركيزها كمان
وبالفعل كلامك صحيح مئة فى المئة ويالايت نوفر الجهد فى فتح مواقع عقيمة عديمة الفائدة تستنفز وجد وجهد ونركز فى بناء موقع متكامل بمحتوى جيد لا قص ولصق
مشكور اخى وفى انتظار الحلقات القادمة بفارع الصبر

شكرا ياجولد ..والله الموضوع ده انا عملته لما لقيتك لوحدك شغال انت واتنين والناس التانيه نايمه
شكرا لتشجيعك...وفعلا عايزين الناس تصحى...يعنى اللى عندى معلومات فى s.e.o والمحركات البحث وال html البيسطه منها يعنى على اساس ان احنا فى منتدى المال والأعمال يعملها موضوع
انا بقالى حوالى 5 شهور فى الموضوع ده..يعنى خبرتى مش كبيره اوى بس الحمد لله تركيزى كويس يعنى واللغه الحمد لله برضه وتوفيق ربنا طبعا فى الأول خلانى أعرف حاجات كتيره

على العموم فعلا يا جولد ياريت الكبار يصحوا....وشكرا لمجهوداتك

الكلام الكبير اوى ده كتير عليا
إلى الأمام......دائما

[minapop]

بجد ياستاذا whyiloveyou موضوعك اكثر من رائع وياريت تكمل لانى مش فاهم الموضوع دة كويس واكون شاكر لو شرحتة باستفاضة ولك منى خالص شكري وتقديري وللامام دائما

[whyiloveyou]

شكرا يا minapop ...متهيأ لى ان الموضوع بسيط أوى ...ومع ذلك بس قول لى على اللى مش فاهمه وأنا أحاول أوضحلك أكتر..
إلى الأمام......دائما

[nurkabil]

ان طريقتك في الكتابة وتوضيح فكرتك للناس
طريقة جميلة وذكية
انصحك بان تستخدمها في موقع خاص بك او مدونه وسترى الكم الهائل من الزوار
ارجو ان تكون هنالك اجزاء اخرى للحوار
مع تقديري

[Hos_000]

ربنا يوفقك والي الامام دائما

[whyiloveyou]

ان طريقتك في الكتابة وتوضيح فكرتك للناس
طريقة جميلة وذكية
انصحك بان تستخدمها في موقع خاص بك او مدونه وسترى الكم الهائل من الزوار
ارجو ان تكون هنالك اجزاء اخرى للحوار
مع تقديري

أشكرك nurkabil على تشجيعك...أنتوا كده والله بترفعوا من روحى المعنوية ..
والله هنا ...هناك...منتدى...موقع...أى مكان....المهم إنها توصل

تعرف أنا أول ماكنت بتكلم على المدونات وتصميم المواقع والميتا وال html وكتبت مساعده فى موضوع....محدش رد عليا خالص فى المنتدى..أو يمكن واحد او اتنين وبينى وبينك محدش فادنى..يعنى الناس مش فاضيه...
فى نفس اليوم والله...بكلم واحد على الشات مع انى كنت بطلت شات من زمان...
المهم...بدون مبالغة...مكنتش فاهم موضوع ....قعد يشرح ليا ساعتين ويمكن أكتر فى الحاجات اللى كنت بسأله عليها..المهم ان الراجل ده من أمريكا ومش عايز منى حاجه أساسا....
ده أنا حتى جاى أضيفه مرضاش....يعنى الراجل بيشرح لك المعلومه من غير مقابل...
من جهه تانيه برضه...لقيت الأخ جولد....بيعمل مواضيع كويسه ولقيته بصراحه شغال يمكن لوحده...قلت أعمل حاجه كويسه...
واللى أنا متعلمتهوش أعلمه للناس برضه...
الحمد لله...وأى حد محتاج أى استفسار ...يقول لى عليه وأنا ان شاء الله أوضح له أكتر لو هقدر

إلى الأمام دائما

[yano_st]

و الله يا اخ whyiloveyou طريقة كتابة الموضوع فوق الرائعة مسلية و تشد كما انها مليئة بامعلومات المفيده

كمان عايز اقول حاجة مهمة جدا المهم...بدون مبالغة...مكنتش فاهم موضوع ....قعد يشرح ليا ساعتين ويمكن أكتر فى الحاجات اللى كنت بسأله عليها..المهم ان الراجل ده من أمريكا ومش عايز منى حاجه أساسا....

الحاجات دي بتبقى بتاعة ربنا وتحس انها رسايل كدا من عند ربنا علشان كده لازم تستغل الموضوع ده و تبذل فيه جهد كويس وان شاء الله يعود عليك بالخير

ايه اللي يخلي واحد امريكي وخصوصا ان الناس دي وقتها من دهب وكل حاجة عندهم كام ؟

و كمان توصيل المعلومة دي بتبقى نابعة من جوة الواحد نفسو زيك بردو انك جيت هنا وحطيط الموضوع و بتشرح و ترد على الاعضاء و زي مواضيع كتير لناس كتير هنا في المنتدى بذلوا فيه جهد كبير مش مستنين مقابل من حد و مش عايز اقول اسماء مواضيع علشان مانساش حد لان المنتدى هنا زاخر بالاعضاء المتميزين

علشان كده ربنا يكرمك و الى الامام

[whyiloveyou]

و الله يا اخ whyiloveyou طريقة كتابة الموضوع فوق الرائعة مسلية و تشد كما انها مليئة بامعلومات المفيده

كمان عايز اقول حاجة مهمة جدا

الحاجات دي بتبقى بتاعة ربنا وتحس انها رسايل كدا من عند ربنا علشان كده لازم تستغل الموضوع ده و تبذل فيه جهد كويس وان شاء الله يعود عليك بالخير

ايه اللي يخلي واحد امريكي وخصوصا ان الناس دي وقتها من دهب وكل حاجة عندهم كام ؟

و كمان توصيل المعلومة دي بتبقى نابعة من جوة الواحد نفسو زيك بردو انك جيت هنا وحطيط الموضوع و بتشرح و ترد على الاعضاء و زي مواضيع كتير لناس كتير هنا في المنتدى بذلوا فيه جهد كبير مش مستنين مقابل من حد و مش عايز اقول اسماء مواضيع علشان مانساش حد لان المنتدى هنا زاخر بالاعضاء المتميزين

علشان كده ربنا يكرمك و الى الامام

لك كل الشكر والتقدير ياأخ yano ...مفيش شك طبعا إن المنتدى فيه ناس كويسه وتعمل شغل كويس ومتهيأ لى أنا ذكرت الناس دى...أنا بتكلم على القسم نفسه اللى هو منتدى المال والأعمال.
بالنسبة للراجل الأمريكى اللى أنا إتكلمت معاه فى الياهو..أنا كلمته مره واحده بس..ومكلمتوش تانى.. يعنى مكنتش أعرفه ولا يعرفنى وكان الموضوع عن html لما بصراحه تعبت وملقيتش حد رد عليا....
أنا بصراحه كنت مستغرب إن فيه ناس كده وبجد صعبت عليا نفسى ومكنتش عارف أشكر الراجل إزاى...
يعنى الراجل كان فى غنى إنه يضيع وقته مع واحد زى حالاتى...بس طبعا هو حاسس إن فيه ناس ساعدته لما كان برضه مبتدأ علشان كدا هو حابب يساعد الناس...
هيا الخبره بتيجى من إبه....
خلي مثلا واحد إداك دومين هديه وقال لك قدامك الفرصة إنك تعمل موقع كويس ...أكيد طبعا لازم تلف وتدور وتطلع من منتدى لمنتدى ومن رروم لرووم...ومن موقع عربى لموقع أجنبى علشان تتعلم....إتعلمت وبقيت زى الفل وتمام....
إيه المانع لو تعلم الناس اللى إنت إتعلمته مهما كان بسيط...
هو إنت اللى إنت إتعلمته ده من مين...ماهو من الناس برضه....ولا إنت مثلا جايبه من عندك....ولو متعلموش ماهو هيتعلمه برضه....هياخد وقت..بس هيتعلمه
بجد الواحد بيغيب طول عمره بيتعلم....
أنا عندى إحساس غريب أوى دلوقتى....وسؤال محيرنى....هيا متجيش إلا من الغريب ليه؟
ربنا يهدى ...والناس اللى فى بالى تفهم بقى......يارب

إلى الأمام دائما

[yano_st]

لا و الله لسة في عرب زي الفل و ان شاء الله الناس هنا كلها بساعد بعض و انا شخصيا لما بعرف حاجة بحطها و اجتهد في شرحها علشان الناس كلها تستفيد

طيب انت عارف انا ماليش في الموضوع بتاع المواقع ده قوي يعني تضرب في دماغي كده اني اعملي موقع على استضافة مجانية من باب العلم بالشئ بس لكن و الله طريقتك هى اللي شدتني للموضوع

عموما انا كنت عايز اقول بمناسبة موضوع ماتجيش غير من الغريب :

انا بتعلم الفوركس دلواتي بس من منتدى تاني مش هنا و و الله الراجل اللى عامل الدورات و مواضيع المبتدئين انا مطلع عينو كل يوم اسئلة و الراجل بصراحة عمرو ما تاخر بجد مش عارف فعلا انا ازاي ممكن اردلو و لو جزء صغير من المعلومات اللي انا عرفتهاعن طريقو و كمان مش كده و بس ده متابع معاي و كل سؤال بيجاوبني عليه و لو مايعرفوش مايقلش ماعرفش يسال حد و يرد على و الله متهيالى مش هاقدر اعمل اي حاجة غير اني ادعيلو و اقول روح يا شيخ ربنا يكرمك و يكرم الناس اللي زيك

و يكرمك انت كمان يا اخ whyiloveyou و استمر الى الامام رغم اني مش فاهم حاجة بس الموضوع حلو استمر كده و كلنا في انتظار الجزء التاني

[whyiloveyou]

يا أخ yano أنا نفسى أعرف إيه بس اللى مش فاهمه يمكن أقدر أساعدك..
أصل لاحظت إنك فى كل رد لك بتقول إنك مش فاهم حاجه...

بالنسبة للفوركس أنا خلاص بقيت بحلم بيها...ولما حد بيقولها قدامى بيجيلى على طول حساسية.

100 مليون شاب عاملين مدونات عن الفوركس....تدخل المدونة من دول تلاقى صفحة فوركس وإعلانات جوجل ..
300 حالة انتحار علشان عاملين مدونة عن الفوركس بقالهم 10 سنين وكسبوا 2 دولار....
90% من الناس اللى عاملة المدونات دى متعرفش يعنى إيه الفوركس دى أساسا.....
متهيأ لى نوع دواء....مش كده؟!!!

ربنا يكرمنى ويكرمك ويكرمة...ويكرمنا كلنا إن شاء الله
إلى الأمام .....دائما

[rabahdic]

والله ولا أحلى من كدا أي طريقة لكي يفهم الكل أن العمل الجاد والتجربة والنية الحسنة هم سبل النجاح لا غير. لازم كل "الخسرانين" يعلموا أن الطرق الملتوية لتحقيق الربح من آدسنس هو جوجل بيعرفها قبل ما يحط آدسنس أصلا.

طب خلينا نقرأ الحلقة التالية يا أخي والله شوقتنا

[yano_st]

يا أخ yano أنا نفسى أعرف إيه بس اللى مش فاهمه يمكن أقدر أساعدك..
أصل لاحظت إنك فى كل رد لك بتقول إنك مش فاهم حاجه...

بالنسبة للفوركس أنا خلاص بقيت بحلم بيها...ولما حد بيقولها قدامى بيجيلى على طول حساسية.

100 مليون شاب عاملين مدونات عن الفوركس....تدخل المدونة من دول تلاقى صفحة فوركس وإعلانات جوجل ..
300 حالة انتحار علشان عاملين مدونة عن الفوركس بقالهم 10 سنين وكسبوا 2 دولار....
90% من الناس اللى عاملة المدونات دى متعرفش يعنى إيه الفوركس دى أساسا.....
متهيأ لى نوع دواء....مش كده؟!!!

ربنا يكرمنى ويكرمك ويكرمة...ويكرمنا كلنا إن شاء الله
إلى الأمام .....دائما

يا اخي و الله انا لا عامل مدونات و لا مواقع و لا حاجة انا باتعلم الفوركس لنفسي علشان ابقى متاجر محترف مش علشان اعمل موقع و لا عمري اتعاملت مع ادسنس اصلا
انا لسة باتهته في مواضيع المواقع دي علشان كده باقولك انا مش فاهم حاجة انا لسة بتاكد من معنى كلمة دومييين ( هههههههه) مبتدا جدا يعني

بس باتعلم و بسرعة جدا و مستني الحلقة التانية

و ربنا يكرمك

[zahrania]

thanxxx man its a very interesting way to explain

[whyiloveyou]

ماشى ياعم ربنا يوفقك...وتبقى أحسن واحد فى الفوركس...بس تبقى تفتكرنا بقى....

أما الأخ المحترم اللى بيسأل عن الحلقة التانية...إن شاء الله قريب جدا جدا جدا

ومتشكرين على كل اللى شجعنى واللى عايز يستفسر عن أى حاجه أنا موجود

إلى الأمام....دائما

[sahar88]

wow
الموضوع اكثر من رائع .......
وفي انتظار التكملة ........
thanks alot

[unknown1]

طريقة جميله و سهله في الشرح .
شكراً لك ، و في إنتظار الجديد ...

[samire85]

شكرا لك حبيبي

[Cash-Money]

رائع رائع رائع رائع رائع
بل هو اكثر من رائع
وجزاك الله كل خير

[abd.wahed]

____________

[المبدع الحقيقي]

مشكوووووووووووووووووور يا عزيزي

[yessa]

موضوع رائع و جميل من شخص أروع بكثير
بارك الله فيك أخي

[stormbreaker]

حاجه جميله و معلومه جديده

[ابو عبد الفتاح]

برافو عليك يا اخى موضوع رائع واسلوب سلس ومعلومات قيمة
الآن عرفت whyiloveyou

[RootShell-vb]

مشكور اخى وفى انتظار الحلقات القادمة بفارع الصبر

[blacksnake00]

لا كمل يا باشا كلامك حكم
بس ياريت الاخراج بتاع الحوار يتعدل شوية
علشان فى حتى فيها غلط فى الحوار دة مثال
كسبان: ماهو إنت بتبقى نايم...واللى دخل موقعك ده كمان نايم..يعنى ولا هو بيشوف موقعك ولا إنت بتشوف موقعه...هو بيشغل الأوتو سيرف بتاع الموقع وإنت بتشغل برضه وأهو انت بتدخل مثلا على 100 موقع وغيرك برضه بيدخل على ال100 موقع..بس مفيش حد بيشوف موقع التانى...قول لى ياكسبان..هو انت مسجل موقعك على محركات البحث؟

ازاى كسبان بيتكلم وبيقول يا كسبان
بهرج طبعا عادى يعنى الكلام مفهوم وبجد موضوع ممتاز وفى انتظار باقى الحلاقات
جميع حقوق الطبع محفوظة لwhyiloveyou

الطبع جميل بس ياريت ميكنش الحبر اقل من كدة علشان كدة الخط واضح
ههههههههههههه

[zerocool1]

بارك الله فيك وجزاك الله كل خير
بجد موضوع روعة
وانا فى انتظار الباقى

[hero525252]

شكرا جميل قوي الفكرة دي والكلام مظبط ما شاء الله عليكك وان شاء الله مستقبلك كويس

[shadi-ib]

شكراااااا وفي انتظار الباقي

[altneen_20]

شكرا اخى جدا على موضوعك الجميل وعلى وطريقة سردة المصرية الجميلة
مع احترامى ليك ياريت تاخد بنصيحتى
لا يجوز الحلف بالنبى
وثانيا الصورة الى انتا حاططها بتاخد سيئة على كل وحد بيبصلها
والريفيلز شغال بئة هههههههههههههه وشكل الريفريلز 100% ولا حاجة
شكرا
سلام

[thesmallfoxx]

شكرا اخى جدا على موضوعك الجميل وعلى وطريقة سردة المصرية الجميلة
مع احترامى ليك ياريت تاخد بنصيحتى
لا يجوز الحلف بالنبى
وثانيا الصورة الى انتا حاططها بتاخد سيئة على كل وحد بيبصلها
والريفيلز شغال بئة هههههههههههههه وشكل الريفريلز 100% ولا حاجة
شكرا
سلام

فين الصوره ديه مفيش أى صور وحشه

[altneen_20]

اخى اذا ما كنتش شايف ان الصورة الرمزية دى مش حلوة فدى مشكلتك بئة
شكرا
سلام

[ary190ary]

موضوع جميل و هادف , شكرا ....

[designer15]

شكرا على الموضوع الجميل