شرح عالسريع للجنرال الروسي Kav6 .. [الأرشيف]

Golden Dream

01-07-2007, 06:50 PM

بسم الله الرحمن الرحيم

النهارده عندي شرح عالسريع لبرنامج ال Kaspersky Antivirus الروسي .. وهو فعلا من اقوى البرامج اللي ممكن تتعامل معاها في حياتك بشهادة القراصنة والمواقع المشهورة .. وانا شخصيا باستعمله ..

دي واجهة البرنامج الرئيسية ..

http://up.arabsgate.com/u/3927/2700/28784.jpg

1- مربع المعلومات .. وهنا هتلاقي المعلومات السريعة اول بأول ( زي شريط الاخبار كده :) ) لو مثلا بقالك كثير معملتش تحديث .. فيروسات اتقفشت وعايزك تتصرف معاها .. وطبعا لو السيريال اللي انت مدخله عشان تسجل البرنامج مضروب هيفضحك :D ..

2- حالة او وضع الجهاز بتاعك .
السطر الاولاني بيقلك اذا كان في حد ممسوك جديد ولا كله متروق :) .. طبعا في الصورة الجهاز الحمد لله زي الفل (ده طبعا بعد ما مسك الف فيروس ومسحهم :D ) ..
السطر التاني بيديلك اخر معاد انت حدثت البرنامج فيه ..
السطر التالت بيقلك حالة الحماية الفورية real protection او التلقائية .. وكمان بقيت الحمايات شغالة ولا في منها حاجة متعطلة ..

3- هنا ممكن تتحكم في الحماية التلقائية اللي قلنا عليها .. عن طريق الزراير اللي على اليمين ..

4- الشاشة دي (اللي في الصورة) بتظهر لما تدوس هنا ..

5- بيوديك على شاشة تانية فيها معلومات الفحص ..

6- شاشة غيرهم فيها معلومات التحديث والبرنامج ونظام التشغيل بتاع الجهاز .. الخ

7- معلومات الحماية التلقائية .. كام ملف تم فحصه .. كام اتقفش .. وكام لم يتم معالجته (التفاهم معاه :D )

----------------------------------------------------------------------

http://up.arabsgate.com/u/3927/2700/28785.jpg

طبعا زي ماهو واضح ان الشاشة دي موجود لما بتدوس على File Antivirus .. وبردو ممكن تتحكم فيه عن طريق الزراير على اليمين ..
طبعا الخاصية دي مهمة .. لانها بتفحص اي ملفات تفتحها او تحاول تفتحها .. وبالتالي بتمنع الفيروسات انها تشتغل .. حتى لو الملف فيه فيروسات ..

1- هنا بيديك معلومات عن الحالة الشخصية بالنسبة للخاصية المهمة دي .. ولو ضغطت في اي مكان في المربع 1 ممكن تتحكم في الاختيارات الموجودة .. كلمة Action بتقلك التصرف اللي هيتصرفه البرنامج مع الفيروسات (الملفات) اللي بتتمسك .. وهنا انا عاملها على انه يسألني (انا اللي اتصرف) .. وهنشرح تغيير الاعدادات في الصور الجاية ان شاء الله ..

2- هنا المعلومات عن الملفات المفحوصة (عددها) و الممسوكة .. وكام ملف لسه متعالجش ..

------------------------------------------------------------------------

http://up.arabsgate.com/u/3927/2700/28786.jpg

هنا اتنقلنا لخاصية تانية وهي حماية الايميلات ..
طبعا نفس الشاشة اللي فاتت .. والحاجات الجديدة هي ..
Traffic Scan
ودي خاصية بتفحص الايميلات اللي رايحة والجاية (حسب الاعدادات طبعا) من الفيروسات ..
Email Client Plug-ins
ودي بتوفر plug-in او اضافة لبرامج التعامل مع الايميلات (زي Outlook مثلا) بحيث انك تلاقي tap جديدة للكاسبر في البرنامج زي الصورة دي ..
http://up.arabsgate.com/u/3927/2700/28813.jpg
والصورة دي من الoutlook بتاعي وممكن تجيبها من tools وبعدين options ,,
------------------------------------------------------------------------

http://up.arabsgate.com/u/3927/2700/28787.jpg

خاصية حماية الويب .. وزي ماحنا عارفين ان ديدان (worms) النت بتوصل للجهاز وانت موصل النت بس (حتى لو مش فاتح مواقع) .. عن طريق سكربتات وحاجات عايزة شرح طويل جدا وانا معرفش تفاصيلها كلها .. البرنامج بيفحص السكربتات وبروتوكول http بتاع التصفح كمان ..
------------------------------------------------------------------------

http://up.arabsgate.com/u/3927/2700/28788.jpg

خاصية الحماية من الفيروسات الجديدة .. ودي خاصية جامدة طحن .. (يعني ايه من الفيروسات الجديدة ؟) ... يعني حتى لو ظهر فيروس جديد جدا في جهازك لسه تحديثات الكاسبر ذات نفسه ماكتشفتهوش .. هيمنعه انه يخرب اي حاجة (ازاي؟) ببساطة اي ملف يحاول يلعب في اساسات البرامج او الريجستري ..الخ هيمنعه ويعتبره من الفيروسات الجديدة ..
1- هنا حالة الخاصية دي .. وهشرحها بالتفصيل ..
Proactive Defense
وده اسم الخاصية وقدامها مكتوب شغالة ولا لا ..
Application Activity Analyzer
وهي دي اللي هتمسك الفيروسات الجديدة .. دي بتفحص نشاطات البرامج والملفات (من ضمنها الفيروس ) ويقفش اي نشاط غريب يحاول يلعب في اساسات .. الخ
Application Integrity Control
وده نوع تاني من نشاطات البرامج (صفحة ويب ..الخ) ..
Registry Guard
طبعا من الاسم .. حارس الريجستري (اللي هي قيم التسجيل) ..
قيم التسجيل هي قيم (كود من ارقام وحروف) يضعها كل برنامج في الويندوز ليتم التعرف عليه ..
Office Guard
ودي للحماية من الملفات المرئية او ال Macro (زي مثلا الفجوال بيزك والPDF maker) .. الخ

2- حالة الملفات والانشطة التي تم فحصها والتي تم اغلاقها ومنعها ..

Golden Dream

01-07-2007, 06:51 PM

بسم الله الرحمن الرحيم

نكمل الشرح ..

http://up.arabsgate.com/u/3927/2700/28789.jpg

وهنا دخلنا قسم جديد .. اللي هو Scan او الفحص .. اللي مشاور عليه بالماوس في الصورة ..

1- اماكن مختارة من البرنامج لفحصها .. اللي عاوز تفحصه تحط عليه علامة صح في المربع وتدوس scan ..
وممكن كمان تضيف اماكن تانية تختارها انت لما تدوس add على اليمين ..

2- اعدادات الفحص .. ممكن تغير ال action من الزرار اللي على اليمين .. عشان تختار البرنامج يتصرف ازاي مع الفيروسات اللي اتمسكت (يحذفها على طول ولا يسأل .. الخ) ..

--------------------------------------------------------------------------

http://up.arabsgate.com/u/3927/2700/28790.jpg

نفس الشاشة اللي فاتت بس الفرق انه هنا حاطط الاماكن الخطيرة والمهمة في الجهاز .. وعادي بردو ممكن تضيفلها او تحذف منها .. الخ
اللي انا مشاور عليه في الصورة هو الجديد .. نظام العمل .. وهنا انا عامله يدوي .. ممكن طبعا تعمله في اوقات معينة ..

-------------------------------------------------------------------------

http://up.arabsgate.com/u/3927/2700/28791.jpg

نفس اللي فاتت بردو .. بس للجهاز كله .. وحبيت اوريكم قوة البرنامج انه بيفحص الملفات التنفيذية اللي بتشتغل مع بداية تشغيل الجهاز .. الشبكات المتوصلة .. وكمان الفلاشات والهاردات الخارجية .. الخ

--------------------------------------------------------------------------

http://up.arabsgate.com/u/3927/2700/28792.jpg

الصورة دي حاططها بس عشان اوريكم انه بيفحص من ضمن الحاجات وملفات بداية التشغيل .. البوت سكتور .. شفتوا الافترا :) ..

--------------------------------------------------------------------------

http://up.arabsgate.com/u/3927/2700/28793.jpg

قسم تاني وهو الخدمات .. Service

1- معلومات عن البرنامج من الناحية التقنية ( امتى اخر تحديث حصل .. عدد ملفات التحديث .. رقم الاصدارة) ..

2- واضح انه نظام تشغيل الجهاز طبعا ..

3- معلومات عن البرنامج من الناحية التجارية (المالك .. رقم المنتج .. نوع الشراء .. تاريخ انتهاء الصلاحية ) ..

-------------------------------------------------------------------------

http://up.arabsgate.com/u/3927/2700/28794.jpg

ندخل بالتفصيل في الخدمات .. الاول ال Update ..

انا هنا عامله اوتوماتيك زي ماهو واضح ..
زرار Update now عشان يبتدي تحديث .. و roll عشان يعمل استعادة .. وهشرحها ..
Rollback
الخاصية دي هي خاصية استعادة التحديث السابق (وليه الهبل ده الناس بتتقدم وانا اتأخر ؟!) .. لا هو مش بالمنظر ده .. البرنامج لما بتعمله تحديث بيعمل نسخة منه (هي اللي ممكن يتعملها استعادة او rollback) احتياطي (ل إيه بالظبط ؟) عشان لو جيت تعمل تحديث جديد وفشل في النص .. تعمل rollback عشان تستعمل التحديث الناجح اللي قبله .. وتبقى تحدث وقت تاني لما تعرف المشكلة ..
وبعدين اوعى تقلق .. انت نسيت خاصية ال Proactivate ولا ايه ؟ :)
-------------------------------------------------------------------------

http://up.arabsgate.com/u/3927/2700/28795.jpg

الخاصية دي مهمة جدا للي عندهم شبكات .. ممكن واحد بس ينزل التحديثات بتاعت البرنامج وينزلها في ملف عالشبكة عشان بقيت الاجهزة تحمله من الملف (عشان يتجنب الضغط على السيرفر بتاع البرنامج اللي عالنت) ..
ملحوظة ..
ممكن تغير مكان الملف بالضغط على اي مكان داخل المستطيل Settings ..

--------------------------------------------------------------------------

http://up.arabsgate.com/u/3927/2700/28796.jpg

الملفات اللي بتتقفش بيتعملها نسخ قبل ما يتم مسحها او التصرف معاها .. وبيتشالو في المحظورات (Quarantine) .. وكمان الاحداث بتاعت البرنامج والحاجات اللي اتعملت متسجلة في Reports او تقارير .. كل ده اسمه Data Files .. وطبعا ليك مطلق الحرية انك تمسحه بالضغط على Clear ..

--------------------------------------------------------------------------

http://up.arabsgate.com/u/3927/2700/28797.jpg

دي بردو من الخواص المهمة جدا .. ده لعمل اسطوانة حماية احتياطية .. عشان لو الفيروسات دمرت ووقعت الويندوز ماتقعدش تفرمت وتعيط على الفات وتسمع اغاني ام كلثوم .. الخ زي ما بيحصل معانا كلنا ..
لا تعيد التشغيل والسي دي هيشتغل لوحده بدل الويندوز (يعمل Boot) وفيه اختيارات لعمل لفحص .. الخ .. والميزة الجامدة انه بيعمل بوت على نظام الاقلاع النظيف او Clean Boot واللي مش بيعتمد على اي ملفات من الهارد (اللي في العادة بتبقى في البوت سكتور) عشان يعمل بوت .. لا بيقلع من نفسه .. وعشان تعمله لازم البرنامج اللي انا معلم عليه تحمله من النت .. اضغط عليه بس عشان يفتحلك صفحات نت تحمل منها البرنامج ..
وبالنسبة لطريقة عمله .. فإن شاء الله في موضوع مستقل ..

--------------------------------------------------------------------------

ال Support ملهوش لازمة اوي .. لكن هتلاقي جوا الموقع للدعم الفني .. الخ

--------------------------------------------------------------------------

http://up.arabsgate.com/u/3927/2700/28798.jpg

نخش بقى على الاعدادات .. وطبعا بتجيبها لما تدوس Settings في اي شاشة من اللي فاتو ..

ملحوظة .. احنا هنمشي بالترتيب في الخانة الشمال .. مع الماوس يعني ..

1- لالغاء او تفعيل ال real protection .. شرحناها فوق :) .. والاختيار اللي تحته عشان البرنامج يشتغل مع الويندوز (في بداية التشغيل) ..
2- Trusted Zone أو المنطقة الموثوق فيها (ماهو البرنامج جبار ياخوانا وبيشك في اي بني ادم ماعدا اللي هنا) .. وهشرحها ..
لما تدوس على الزرار تجيلك الشاشة دي ..
http://up.arabsgate.com/u/3927/2700/28810.jpg

طبعا الزراير على اليمين بقت معروفة ..
تحت بيديك معلومات عن الملف التنفيذي (غير البرنامج) اللي انت محدد عليه (مظلل) ..
القائمة اللي فيها اسمي هي قائمة الملفات التنفيذية الموثوق فيها .. وانا معاهم طبعا :D ..
القائمة تحت عنوان Verdict تحت الماوس .. بتحددلك نوع الملف التنفيذي .. عايزة خبرة حبتين
ندوس على Trusted Applications فوق (اللي انا مشاور عليها بالماوس) عشان ننتقل الي البرامج الموثوق فيها ..
http://up.arabsgate.com/u/3927/2700/28811.jpg

كل حاجة زي ما هي .. بس اهم حاجة انك تضيف الماسنجر والمتصفح بتاعك (زي اللي عليهم مستطيلات) عشان ميقرفكش البرنامج كل شوية انذارات .. وطبعا لو برنامج انت عارفه وعملك انذار ليه .. ضيفه هنا ..

---
3- سيبه زي ما هو .. ومعناه انك عايز تعتبر ان الانواع دي ملفات تجسس ..
4- لو عايز تعتبر ان الانواع المشكوك فيها تجسسية وتخلي البرنامج يسألك ويديك انذارات عليها (ممكن يكون فيها برامج انت واثق فيها ) ..

5- عشان تعمل تصليح للملفات بدل ما تتحذف (لو ينفع تتصلح) ..
6- عشان تلغي الفحص المحدد بمواعيد لو شغال على بطارية (للمحمول) ..
7- لو انت محدده البرنامج هيعمل توقف مؤقت او Pause للفحص اللي شغال في حالة ان المعالج Processor مشغول مع برامج تانية عشان الجهاز ميهنجش .. (انا معجب بالبرنامج ده جدا !! ) ..
--------------------------------------------------------------------------

http://up.arabsgate.com/u/3927/2700/28799.jpg

الخاصية دي شرحناها .. وهنا ممكن تغير مستوى الحماية بال slider اللي في ال security level ..
Recommended
كويس لمعظم المستخدمين .. وبيعمل حماية على المستندات والملفات عن طريق فحص المحتوى .. واعدادات تانية ممكن تشوفها وتعدلها لما تدوس على Customize ..
High
لو الجهاز مليان فيروسات (بالشفا ) ..
Low
يعني لو انت جهازك نظيف ومش بتدخل عالنت ومطمن اختاره عشان سرعة فتح الملفات تزيد ..
لكل حالة منهم ممكن تعدل ب Customize ..

من تحت تختار ال Action او التصرف اللي عايز البرنامج يعمله لما يقفش حاجة ..
prompt for action
عشان يسألك يعمل ايه ..
Block access
عشان يمنع الوصول او التعام معاه مباشرة ويتخد الخطوات التالية ( حسب اختيارك) واللي هي ..
Disinfect
تصليح
Delete if disinfection fails
يمسحه لو مش راضي يتصلح ( مش نافع الذوق طب اديله عالقفى !!)
--------------------------------------------------------------------------

http://up.arabsgate.com/u/3927/2700/28800.jpg

كل حاجة زي ماهي .. بس الفرق هنا عشان ايميلات .. في الخاصيتين بتوع السيرفرات وال outlook ..
--------------------------------------------------------------------------

http://up.arabsgate.com/u/3927/2700/28801.jpg

بردو نفس الشاشة .. بس الفرق في ال action انه يا إما يسألك او يمنع او يسمح ..
والاختيارات اللي تحت بتاعت البروتوكول http بتاع التصفح .. والسكربتات ..
--------------------------------------------------------------------------

http://up.arabsgate.com/u/3927/2700/28802.jpg

طبعا شرحنا الخاصية الجامدة دي .. وهنا ممكن تغير اعدادات كل واحد منهم ..
--------------------------------------------------------------------------

http://up.arabsgate.com/u/3927/2700/28803.jpg

قسم الفحص .. الفرق بس في ال action انك ممكن
يسألك بعد الفحص ما يخلص ..
او يسألك اثناء ما بيفحص ..
أو ميسألكش ويتخد الخطوات المعروفة ..
تدوس Apply عشان تنفذ اللي اخترته في ال action على كل الاقسام الاخرى (زي file antivirus مثلا) ..
-------------------------------------------------------------------------

http://up.arabsgate.com/u/3927/2700/28804.jpg

الفرق في ال Run Mode او نظام العمل .. يعني لو عايزه سعتك بمواعيد محدده تناسب جدول مواعيد حضرتك .. الخ .. وطبعا تغير المواعيد من Change ..

--------------------------------------------------------------------------

http://up.arabsgate.com/u/3927/2700/28805.jpg

قسم جديد .. Service ..

1- تلغي او تفعل الانذارات .. و advanced للتحكم فيها .. لما تدوس ينقلك هنا ..
http://up.arabsgate.com/u/3927/2700/28812.jpg

قدامك كل الاوضاع اللي ممكن البرنامج يقابلها في دنيته .. وتختار تحب يبلغ حضرتك عنها ازاي ..
Baloon
مش عارف اقول ايه .. بلونة يعني رسالة صغيرة من الزاوية (tray icon) بتاعت الكاسبر ..
Sound
بالصوت ودي مش بحبها عشان بيجيبلي صوت قطة حد خبطها بحاجة او شد ديلها ..!!
E-mail
اعتقد مش مستاهلة انه يبعتلك ايميل !!
log
تقرير مكتوب باللي حصل (مذكرة تفتيش دولية :) ) ..

وطبعا تقدر تعدل الاعدادات بتاعت كل من الايميل والتقرير .. حسب اللي انت مختاره .. وانا في الصورة مختار الايميل (عشان الشرح بس !!) .. عشان كده ظاهر زرار اعدادات الايميل بس دون التقارير ..
-------------

2- خيارات الحماية الذاتية (طبعا لما تبقى مشهور هتبقى مستهدف :) ) .. وهشرح بالتفصيل للعناصر ..
Enable Self-Defense
عشان البرنامج يمنع مسحه من البرامج او المعالج او حتى قيم التسجيل (من مين؟) من الفيروسات طبعا اللي هدفها الاساسي عند تصميمها تخريب برنامج الحماية عشان تعرف تشوف شغلها !!
Disable External Service Control
اي برنامج خارجي هيحاول يتحكم في البرنامج هيوقفه ..
Enable password protection
عشان محدش حتى من البشر يعرف يعطل ال real protection مثلا او يقفل البرنامج الا بكلمة سرك ..

3- مدير الاعدادات .. لو عايز تحفظ اعداداتك الحالية .. او تعمل load لنظام اعدادات تاني محوفظ على الجهاز .. او reset عشان ترجع كله زي ما كان ..

4- عشان التوافق مع البرامج اللي عندها حماية ذاتية .. لمنع حدوث قفلة :) !!
--------------------------------------------------------------------------

http://up.arabsgate.com/u/3927/2700/28806.jpg

الاختيارات دي اعملها زي الصورة (عشان يحدث البرنامج والشبكة الخاصة بالبرنامج) .. ولو انت خبرة غير من Config ..

--------------------------------------------------------------------------

http://up.arabsgate.com/u/3927/2700/28807.jpg

عشان تظبط محتويات ومكان ملف التحديث بتاع شبكتك ..

--------------------------------------------------------------------------

http://up.arabsgate.com/u/3927/2700/28808.jpg

log no critical events
عشان يسجل كل حاجة حتى اللي مش مهم اوي ..
keep only recent events
عشان يمسح اول بأول ويخلي بس اخر حاجة ..
delete repots after
بعد مدة تحددها ..

Delete items from quarantine & Backup after
ينفذ حكم الاعدام على جميع المعتقلين بعد قد ايه ؟
--------------------------------------------------------------------------

http://up.arabsgate.com/u/3927/2700/28809.jpg

اخر حاجة تهمنا .. وهو المظهر .. لأن اهم حاجة الاخلاق ..
انا بهزر طبعا .. الجامد جامد في كله ..
الكاسبر مش واخد الحياة كلها جد .. في وقت ترفيه ..

1- عشان تستعمل الوان وستايل الويندوز ..
2- تفعل خاصية الشفافية .. وتغيرها بال slider ..

3- تخلي الايقونة اللي جنب الساعة تتحرك لما يكون البرنامج بيعمل حاجة ..
4- هتلاقي الكاسبر حتى بعد ما تطلع من الويندوز وقبل ما تدخل .. !!

واخيرا .. Browse لو عندك Skin عايز تطبقه عشان تغير شكل البرنامج ...
--------------------------------------------------------------------------

وفي الختام .. ارجو المعذرة على اي تقصير فهذا مجهود شخصي وليس منقول سواء شرح او صور .. لذا فإن اي تقصير فهو مني ومن الشيطان .. وما كان من خير فهو من الله وحده .. كل اللي عايزه انكم تقدروا تعبي بدعوة من القلب لي ولأسرتي .. وشكرا