الادب الساخر والتعبير عن حال المجتمعات (عبيد القرن الواحد والعشرين)

[IBRAHIM_A]

الأدب الساخر و التعبير عن حال المجتمعات


حوار بين شاعر (-) وزوجته (**)

(عبيد القرن الواحد والعشرين)

- اسكتى , عندى بيتين شعر معصلجين معايا ومحتاج على الاقل الف شهيد وقتيل وشوية
انفجارات على شوية اغتيالات واختطافات على مؤتمرات فاشلة ومؤمرات وشوية سوبر
سترتات وشوية فيديوهات كليبات للجميلات عشان يطلعوا .....

** ياخويا فاكر نفسك المتنبى , والا فاكر نفسك المتنبى !! آل بيتين شعر آل , وكل البلاوى
التى بتحصل دى ولسه عايز اكثر !!! .. ياساترعليك انسان دموى .

- دم لما يلهفك ياوليه , ست جاهله بصحيح , مش عارفه ان الشاعر لازم يعانى عشان يشعر .

** وماله ما انت وغيرك من الشعرا والادبا طول عمركم بتعانوا ايه اللى غيرتوه "عانى ياعنيا
" طول عمرك بتقول كلام فى كلام , وطول عمرنا جعانين والعيال مش لاقيه هدمة تغطيها
ولا حتى قادرين ندخلهم المدارس والفساد عامم وطامم والعروبة بتاعتكم دابت والطوايف
لعلعت والارهاب طاغى فى كل مكان والاصلاح مفروض عليكم خطوة خطوة ومن زمان
والحال مايل والمواطن الحقيقى الغلبان وحياة امى ما بيعرفش ايه اللى بيدور حواليه او حتى
ايه اللى حيحصله , ولسه حنغرق اكثر لان شعوبنا صاحبة القرار ممنوعة من الظهور فى
الصورة الا فى مجالات تكسف " اغانى هابطه , كرة قدم , مسابقات عروض ملكات العبيد
اللى بتفكرنى بعروض سوق عكاظ قبل الاسلام مع الفرق طبعا ,عروض سوق عكاظ للعبيد
كانت بتم ضد رغبة العبد او العبدة , وكانت العروض دى محصورة يااخويا فى منطقة
جغرافية صغيرة , وكان العبد لما تتاح له الفرصة عشان يصبح حر يهرب حتى لو فقد حياته ,
اما سوق عرض العبيد والعبدات دلوقت فهو فضيحه بجلاجل وعلى عينك ياتاجر وكمان
مدعوم من فطاحل الامة واموالهم وكمان بتلف اجساد الحرائر كل الفضائيات وتاكلها العيون
العطشانة للحوم وتعاين البضاعة ملايين من الجماهير التى ليس لها حول ولا قوة وتصوت من
اجلها واحنا المهضومة حقوقنا السياسية المسلوبة حريتنا وارضنا وعرضنا نصوت عليها وعلى حالنا !!!!

- طبعا ما انتى لازم تحقدى على الجميلات . شوفى شكلك وبعدين اتكلمى ...

** مصيبتك انت وامثالك اللى سلموا رقابيهم من زمان يظنوا وبئس الظن بأنهم قادرين على
الاصلاح والتغيير بالكلام الفاضى , انتم فقدتم كل شئ ولا تملكون اى سلاح حتى لو كان كلمة
, ومين قال بأنك حى غلطان , انت ميت ياعبده من زمـــــــــــــــــــــــــــــان .
- اعوذ بالله من الجهل والجاهلين لكن ازاى حتتعلمى وانتى مش عارفه ان الشعر سلاح
والادب سلاح والكلمة فى حد ذاتها سلاح !!!!

** سلاح ايه ياابو سلاح هو ده سلاحك , بيتين شعر !! ياخيبتها اللى عاوزه رجاله !!

- ما فيش فايده سعد زغلول قبل ما يموت قال كده .

** سعد زغلول قال ما فيش فايدة منك ومن امثالك ..

- قومى ياوليه من وشى والا والله العظيم لو ما سكتيش لبلغ عنك انك ضد الحكومه ..

** لأ خوفتنى ياراجل ... انا ضد الحكومة واى حكومة مش قادرة تعمل لصالح ناس الشوارع
الغلابة . انا ضد اى حكومة لو كانت حكومة ابويا الله يرحمه , انا ضد اى حكومة ماعندهاش
القدرة على التواصل والاتصال مع الناس بتوعها وتؤمن بنظرية الكوارث والايمان بيها .

- انت حتتفلسفى على آل نظرية كوارث !!!

** طبعا مش ممكن تعرف نظرية الكوارث لانك بس بتاع صف كلام ..

- اشرحى ياستى منك نستفيد .

** نظرية الكوارث دى نظرية اخدوها من الفيزياء والرياضيات وهى فى كل الاحوال بتشير
الى تغيير مفاجئ وكارثى زى انهيار انظمة مثلا او حتى امبراطوريات وبدون اى تفسير غير
الدوام لله فقط ..

- يانهار اسود ياوليه يعنى الكارثة على الابواب دلوقتى ..

** لسه بدري .. ادى المعاناة يا سيدى كلها قدامك روح اشعر ياحبة قلبى ؟؟ ابدع ياملك
الشعرا

- و تفيد بايه ياشعر وياادب فى احوالنا المايله الله يسامحك قلبتى عليا المواجع .

منقول............


هل يعتبر الأدب الساخر نوع من انواع التعبير عن حال المجتمعات والواقع الذى تعيش فيه
ام انه مجرد تطاول على الرموز الوطنيه والحكومات وليس له اى هدف اخر.


.

[yasser_x]

شكرا للموضوع الممتع يا ابراهيم ويا ريت تستمر في مواضيعك التي عاجلا او اجلا ستترك اثر لدي القراء , والله يا ابو خليل باين ان كل حاجة واي حاجة في زمن المسخ للحقوق والحرية للناس واي نوع من انواع الفنون او حتي الكلام عن احوالنا اصبحت في حكم التعدي علي حضرة الذات الرئاسية او الملكية او البتنجانية المنزهه عن النقد والمحصنة ضد الخطأ او الحمق , يبدو في اعتقادهم ان الحاكم مكلف الهيا وانة افضل من الشعب الذي يحكمه ويؤكد هذة النظرية النفاق المنتشر في كل الاجواء من الماء حتي الهواء زمرة النفاق الخالدة المستمرة عبر العصور في تضليل الناس ونظرية ( الي نعرفة احسن من الي منعرفوش - وامشي جنب الحيط - ومن خاف سلم - ولو مش عاجبك هاتروح ورا الشمس ) ربنا يعافينا من هذا الرعب الازلي الموروث في شعبنا .

[IBRAHIM_A]

شكرا للموضوع الممتع يا ابراهيم ويا ريت تستمر في مواضيعك التي عاجلا او اجلا ستترك اثر لدي القراء , والله يا ابو خليل باين ان كل حاجة واي حاجة في زمن المسخ للحقوق والحرية للناس واي نوع من انواع الفنون او حتي الكلام عن احوالنا اصبحت في حكم التعدي علي حضرة الذات الرئاسية او الملكية او البتنجانية المنزهه عن النقد والمحصنة ضد الخطأ او الحمق , يبدو في اعتقادهم ان الحاكم مكلف الهيا وانة افضل من الشعب الذي يحكمه ويؤكد هذة النظرية النفاق المنتشر في كل الاجواء من الماء حتي الهواء زمرة النفاق الخالدة المستمرة عبر العصور في تضليل الناس ونظرية ( الي نعرفة احسن من الي منعرفوش - وامشي جنب الحيط - ومن خاف سلم - ولو مش عاجبك هاتروح ورا الشمس ) ربنا يعافينا من هذا الرعب الازلي الموروث في شعبنا .

الشكر ليك يا ياسر ولمواضيعك التى تركت الاثر فعلا والتى تتكلم عن الواقع بدون مغالاه
فعلا ماهو الواقع بتاعنا كده ..لن نتكلم عن اعتراض على احكام الدستور ولا فى قرارات
اصحاب الكراسى ولكن تم حظر الكلام والتعبير عن حالنا ولم يكن المقصد هو مجرد الكلام او اللهو
بل المقصود لفت النظر لمطالب الشعب بطريقه سلميه "هل هذه اسائه ؟؟ بيقولك نعم اسائه "
طيب ازاى ؟؟؟..هو كده وخلاص ومفيش تفاهم.
اذا كان الاعتراض جريمه والمظاهرات ذنب والتعبير عن الرأى محرم و المدونات جريمه لاتغتفر..
طيب بأى لغه نتواصل؟؟ ...ما احنا عارفين اللى بيتواصل بيكون نظامه ايه.
قلت يبئى المنفذ الوحيد الذى لم يدخل ضمن خطة قانون الطوارئ هى انواع الادب الساخر لما
تحمل فى معناها من الوان الواقع واشكاله
وربنا يكون فى عون الشعب ويفتح لهم كل المنافذ بس اولا لازم هو يفتح لنفسه منفذ للرؤيه ..
شــــــكرا يا ياسر على المرور وجــــزاك الله خيرا